Emilio Garsia, shefi i departamentit për Integritetin dhe Disiplinën në UEFA, ka zbuluar një tjetër detaj në lidhje me klubin e Skënderbeut.
Agjensia e njohur e lajmeve, “Reuters” shkruan se zyrtari i lartë i UEFA-s Garsia në fjalimin e tij në Konventën Ndërkombëtare të Sportit në Gjenevë ka pasur rezerva për çështjen e manipulimit të ndeshjeve nga Skënderbeu.
“Kemi bërë disa udhëtime drejt Shqipërisë, por vitin e kaluar ne kuptuam se kishim humbur mjaftueshëm kohë dhe parà. Ishte shumë e vështirë të punoje me autoritetet lokale shqiptare”, ka deklaruar Garsia, duke akuzuar direkt institucionet që duhet të merren në Shqipëri me çështjen e manipulimit të ndeshjeve.
Një tjetër detaj që e ka zhgënjyer UEFA-n është dhe mungesa e bashkëpunimit me FSHF-në dhe prokurorinë.
Korçarëve i janë renditur 53 ndeshje të dyshuara për trukim nga viti 2010 deri në 2015-ën. Uefa ka paralajmëruar më parë klubin bardhekuq me një masë drastike, e cila nuk është bërë akoma e ditur nga Komisioni i Disiplinës.
“Organet disiplinore të UEFA-s po marrin në konsideratë masa disiplinore të vërteta. KAS-i Lozanës mbështeti këndvështrimin tonë të bazuar mbi luhatjet e koeficienteve dhe shumave të hedhura nga bastet sportive. Kjo ishte hera e parë kur ne ishim të aftë të tregonim para KAS-it një seri të gjatë raportimesh. Shifrat nuk gënjejnë dhe luhatjet e basteve gjithashtu”, ka thënë Garsia, duke insistuar se gjyqtarët e Arbitrazhit Sportiv në Lozanë pranuan se monitorimi i basteve është “një evidencë e besueshme”.
