Detaje të reja kanë dalë në dritë, nga dosja hetimore e SPAK lidhur me hetimet për ish anëtarët e MEK, të cilat dyshohen për aktivitet spiunazhi për llogari të Iranit. Burime pranë institucionit të akuzës i thanë gazetarit të Fax news Elvis Myrta, se të përfshirë në rrjetin e spiunazhit të Muxhahedinëve, për llogari të Iranit, ka edhe shtetas shqiptar.
Referuar hetimeve të deritanishme të SPAK, dyshohet se personat e vënë nën hetim kanë qenë të rekretuar nga Ministria e Brendshme e Iranit.
Burime pranë SPAK bëjnë me dije se nga hetimet ka rezultuar se ata po përgatisnin një rrjet agjenturor dhe kishin krijuar nja shoqatë në Shqipëri, ku qëllimi ishte marrja e informacioneve për jetesën e muxhahedinëve që jetojnë në kampin në Mëzez.
Shoqata e krijuar drejtohej nga shtetasi Iranian Hasan Heyrani, ish anëtar i MEK.
Fax News mëson se shoqata e quajtur “ASILA”, krijuar rreth një vit e gjysmë më parë, ndodhet në katin e tretë të një vile, përballë shkollës “Gjon Buzuku”, në kryeqytet. Burime nga SPAK bëjnë me dije se shoqata ështe sekuestruar, të pakten deri në përfundim të hetimeve.
Gjithashtu, Prokuroria e Posaçme dhe antiterrori kanë marrë në pyetje si dhe kanë kontrolluar banesat, apo makinat e 11 personave të tjerë. Kontrollet ndaj ketyre personave janë bërë pasi ata dyshohet se, kryejnë aktivitet të ndaluar brenda territorit shqiptar për llogari të Organizatës Terroriste të Gardës Revolucionare të Iranit dhe shërbimeve sekrete të Teheranit.
Fax news mëson se të gjithe të dyshuarit po mbahen në mbikëqyrje nga agjentët e antiterrorit në terren, në pritje të ndonjë mase sigurie apo vendimi për shpalljen e tyre non grata në vendin tonë, pasi deri më tani nuk ka asnjë vendim nga autoritet igjëzbatuese shqiptatre.
Vitet e fundit Shqipëria ka shpallur dhjetra persona non grata, shumica e të cilëve janë shtetas iranianë, ku rasti më i bujshëm është ai i vitit 2018, ku autoritetet tona pas sinjaleve nga shërbimi sekret e antiterrori, shpalli non grata ambasdorin e Iranit dhe një zyrtarë të lartë të kësaj selie./Faxweb.al
