Prokurori i Përgjithshëm, Adriatik Llalla, është takuar mëngjesin e ditës së sotme me kryetarin e Kuvendit të Shqipërisë, takim që nuk ka zgjatur më shumë se 30 minuta, ku u raportua për përfundimin e tij në orën 10:00.
Mësohet se Llalla ka shkuar në zyrën e kryeparlametarit Meta. Ky takim zhvillohet rreth tri orë pas mbledhjes së Këshillit të Sigurisë, e përcaktuar në mesditë në orën 12:00.
Ky takim vjen pas atij të zhvilluar një ditë më parë me Presidentin e Republikës së Shqipërisë, Bujar Nishani.
Ditën e djeshme, Prokuroria e Përgjithshme lëshoi akuza të rënda ndaj ambasadorit të SHBA-ve në Shqipëri, Donald Lu. Paraditen e djeshme, Lu akuzoi Llallën se është kundër reformës në drejtësi dhe po cenon Kushtetutën.
Në replikën e tij, letrën zyrtare drejtuar Kreut të Shtetit dhe kreut të Kuvendit, Prokurori i Përgjithshëm rendiste një sërë akuzash ndaj Lu-së të cilin e akuzoi për presion dhe revokimin e vizave për disa zyrtarë. (XH.A/SHUPLAKA)
Discussion about this post