Takimi me Bashën, Kokëdhima tregon për çfarë biseduan (VIDEO)

Pas takimit me kreun e opozitës Lulzim Basha, kreu i lëvizjes “Zgjidhja” brenda PS-së, Koço Kokëdhima tregon se kanë diskutuar për krizën politike dhe për mënyrat se si mund të shmanget ajo.

“ Biseduam rreth situatës politike në vend, diskutuam për krizën, dhe për nevojën që kjo krizë të kapërcehet, për efektet negative të kësaj krizë nëse ajo vazhdon sepse pa dyshim që kjo krizë ka ndikim në ekonomi, duhet që përmes dialogut të kapërcehet. Palët duhet të diskutojnë për këtë çështje. Diskutuam për nevojën e standardeve të zgjedhjeve të lira, për reformën zgjedhore që duhet t’i japë një zgjidhje përfundimtare në Shqipëri.

Reforma zgjedhore është e pashmangshme dhe duhet të bëjë të mundur që  në Shqipëri nuk duhet të prodhohen më zgjedhje me standarde dyshimta, por zgjedhje të lira dhe të ndershme si të gjithë vendet e tjera.  Kemi diskutuar edhe rreth nevojës së demokratizimit të partive politike, nevojës së instalimit të primareve me ligj që përfaqëuesit të zgjidhen nga populli dhe jo sic ndodh sot nga kryetarët e partive dhe nevojën që partitë politike të kapërcehen situatën e bashkësieve parapolitike në të cilën ndodhen sot dhe të kthehen në parti me stastandard larta sic është e mira e vendit dhe e demokracisë sot.”, tregon Kokëdhima.

Nga ana tjetër, kreu i Lëvizjes “Zgjidhja” tregon se nuk ka hatërmbetje me PD-në, pas konfliktit që përfundoi me heqjen e mandatit.

 “Unë përshëndes bashkëpunimin parimor të forcave politike në Shqipëri dhe inkurajoj këtë bashkëpunim parimor dhe diskutimin parimor mes forcave politike. Unë nuk mbështes kulturën e flirteve që ka ekzistuar në Shqipëri, kulturë pazaresh mes partive të mëdha politike si në 2008,  dhe po në këtë pikëpamje unë i kam denoncuar edhe veprimet kur ka qenë rasti për goditjet politike ndaj mandatit tim. Unë nuk kam ngarkesa politike me askët, ajo është një çështje e kapërcyer, ne kemi interes të diskutojmë çështjet e zhvillimit që preokupojnë qytetarët.”, shton Kokëdhima. 

Ndër të tjera, në takim Kokëdhima e ftoi Bashën që të pranojë propozimin e lëvizjes Zgjidhja që administrata zgjedhore të mos jetë më dypartiake. Ndërsa kreu i opozitës shfaqi mendimin se me një sistem të sigurtë të votimit elektronik, është një mundësi reale që edhe administrata zgjedhore të departizohet. (D.D/Shuplaka)