Drejtoresha e Përgjithshme e Tatimeve znj.Vasilika Vjero paralajmëroi bizneset e turizmit që fshehin taksat se do të përballen me masa të ashpra ligjore, deri në mbyllje të aktivitetit.
““Dëshirojmë t’ju drejtohemi publikisht këtyre sipërmarrjeve për t’iu thënë se nuk do të ketë asnjë tolerancë nga administrata tatimore në funksion të zbatimit të ligjshmërisë së kërtyre bizneseve deri në mbyllje të aktiviteteve të tyre për një përiudhë 30 ditore çka do të dëmtonte realisht aktivitetin e tyre. Sigurisht që ne nuk e dëshirojmë një gjë të tillë, por përpara ligjit janë të gjithë të barabartë. Ndaj zero tolerancë për këdo që mendon se mund të ushtrojë aktivitet të paligjshëm apo mendon se mund t’iu devijojë detyrimeve ligjore”, tha znj. Vjero.
Gjatë fjalës së saj, znj. Vjero nënvizoi faktin se gjatë sezonit turistik, shumë biznese kryesisht në zonat bregdetare, riaktivizohen dhe intensifikojnë veprimtarinë e tyre, në funksion të fluksit të qytetarëve.
“Ne vëmë re se, vijon të ketë ende tatimpagues që janë të paregjistruar, pra zhvillojnë një aktivitet të paregjistruar, apo që ende nuk e kanë riaktivizuar aktivitetin e tyre; nuk lëshojnë kupon tatimor për transaksionet që ata kryejnë, nuk disponojnë fatura për produktet që ata tregtojnë dhe nuk regjistrojnë të punësuarit e tyre”, deklaron më tej Vjero.
Ndërsa për bizneset që kanë vetëkorrigjuar me rritje deklarimet tatimore, Administrata do të ketë një sjellje më të zbutur.
“Për të gjitha këto sipërmarrje, të cilat kanë reaguar pozitivisht dhe që tregojnë një përgjegjshmëri në ushtrimin e aktivitetit të tyre, Administrata Tatimore do të vijojë që të ketë një qasje pozitive duke reduktuar kontrollet tatimore gjatë të gjithë sezonit turistik, për sa kohë këta tatimpagues do të vijojnë që të vetëdeklarojnë në mënyrë të rregullt dhe të paguajnë rregullisht detyrimet tatimore”, theksoi më tej drejtoresha e Tatimeve.
Sipas analizës së riskut te Tatimet, turizmi rezulton një nga sektorët me informalitetin më të lartë në vend.
