Media italiane “Giornale di Puglia” i ka kushtuar një artikull të veçantë zgjedhjeve parlamentare të 25 qershorit në Shqipëri. Që në fillim të artikullit, ajo shkruan se “më 25 qershor pak më shumë se 1.7 milionë votues shqiptarë do u drejtohen qendrave të votimit për të zgjedhur parlamentin e ri që do të jetë në detyrë për katër vjet”.
Ky parlament, sipas “Giornale di Puglia” do të merret me hapat e mëtejshëm të procesit të integrimit të Shqipërisë në Bashkimin Europian e për më tepër me zbatimin e reformës gjyqësore “që ka shqyer politikën shqiptare për më shumë se një vit”.
“Situata është shumë e tensionuar. Sulmet verbale të kryeministrit Edi Rama, kryetarit të Parlamentit dhe Presidentit të Republikës të zgjedhur Ilir Meta dhe kreut të ri të Partisë Demokratike, Lulzim Basha janë shkëmbyer çdo ditë, shpesh me ton shumë agresiv. Ata janë udhëheqësit e tre partive që do të ndajnë mandatet parlamentare në përputhje me votat e shqiptarëve.”, shkruan media italiane.
Më tej, ajo ndalet në situatën parazgjedhore në Shqipëri, tek sistemi tripolar siç shprehet ajo, ku ndryshe nga tri vite më parë, tani janë të gjithë kundër të gjithëve ndërkohë që LSI-në e cilëson si një kandidate serioze për të mbledhur vota dhe siguruar mandate, duke ua marrë kështu dy partive të tjera.
“Katër vitet e qeverisë së Edi Ramës kanë kaluar në mes të skandaleve të kontratave milionëshe dhe polemikave të fuqishme për përhapjen e kultivimit të marijuanës.
Analistët kryesore besojnë se Rama nuk mund të tejkalojë rezultatin e vitit 2013-të, kur ai mori 41.3%, një rezultat që do të garantonte sot zgjedhjen e jo më shumë se gjashtëdhjetë deputetëve nga 140 gjithsej, numër që nuk është i mjaftueshëm për një qeverisje një-partiake.”, shkruan ndër të tjera “Giornale di Puglia”.
Më tej, media italiane në fjalë ndalet tek sondazhet italiane, ku kryesisht Rama shihet si fitues me shumicë absolute, ndërkohë që një tjetër sondazh e nxjerr LSI-në në vend të dytë, përpara Partisë Demokratike.
“Kësaj here loja duket e hapur gjerësisht, me tri partitë politike, ku secila do jetë në gjendje të zgjedhë me cilin prej dy të tjerëve të bëjë koalicionin qeverisës. Votimi do të përfundojë në orën 19:00 të së dielës, por procedurat për numërimin e votave do të marrin disa ditë.”, citohet mes të tjerash në fund të artikullit.
(XH.A/SHUPLAKA)
