Të nisësh Vitin e Ri me “Fake News”

Nga Lutfi Dervishi

Të nisësh Vitin e Ri me Fake News (1)

Letra e Ajnshtajnit për të bijën… rrenë me bisht!

“Vetëm dashuria mund ta shpëtojë botën”. “Dashuria është gravitet”. “Kuptimi jetës është dashuria: – këto fjalë nuk janë marrë nga Bibla, por nga “Letra e Ajnshtajnit” për të bijën
Nëse shkruan në google, titullin e mësipërm të dalin dhjetëra portale qëi ngjajnë deleve që i ka qethur një bari.
Të vjen keq – jo për copy-paste, por sepse në dhjetëra portale me këtë lajm ka mes tyre edhe nga ata që kanë redaksi, kanë redaktorë dhe shquhen për shije.

Ndonjë ka zgjedhur të nisë Vitin e Ri me këtë “lajm” të rremë. Për ta bërë të besueshëm vendoset edhe fotoja e Ajnshtajnit me një vajzë rreth moshësh 10 vjeçare.

Shkencëtari i madh, i njohur për teorinë e relativitetit, pati 3 fëmijë nga martesa e parë. Por, fëmija i parë , – vajza me emrin Lieserl- ndërroi jetë pa mbushur dy vjeç.

Numri i portaleve dhe shpeshtësia e botimit të kësaj “letre” dy vitet e fundit është i frikshëm. Nëse kërkojmë ngushëllim, e gjejmë te fakti që nuk e “ka ngrënë” vetëm media shqiptare. Problemi është se në portalet tona është rritur denduria e “botimit” pasi është sqaruar mëse njëherë që kemi të bëjmë me një mashtrim.
Linku i mëposhtëm e sqaron këtë, të paktën që nga qershori i 2015!

https://invalid.invalid/…/the-truth-behind-einsteins-letter…

Në atë kohë, duket se kemi qenë shumë të zënë me zgjedhjet lokale. 
Por edhe pse vërtetësia e letrës është vënë në pikëpyetje mëse njëherë, vijon botimi i saj si për të vërtetuar një prej thënieve të gjeniut:

“Çmenduria: të bësh të njëjtën gjë përsëri e përsëri dhe të presësh rezultate të ndryshme”
Nuk është turp të pyesësh. Ose nëse je reporte/redaktor me namuz mund të pyesësh google-in dhe t’i afrohesh më shumë të vërtetës.

Nëse Ajnshtajni do të ishte gjallë, ndoshta do të përsëriste thirrjen: është e rëndësishme që gjithmonë të pyesësh. Nuk ekziston kot…kurioziteti.

P.S. duhet pranuar, letra (që po e postoj të plotë) është e bukur, por nuk është e Ajnshtajnit

“Letra….”
“Kur propozova teorinë e relativitetit shumë pak njerëz më kuptuan. Ajo çfarë do të zbuloj tani për njerëzimin gjithashtu do të pritet me keqkuptim dhe paragjykim.
Po të kërkoj të ruash letrat e mia për sa kohë të jetë e nevojshme: vite, dekada, derisa shoqëria të ketë bërë aq progres sa të arrijë të pranojë çfarë do të shpjegoj më poshtë.

Ekziston një forcë kaq e fuqishme sa deri sot shkenca nuk ka arritur t’i gjejë një shpjegim. Është një forcë që përfshin dhe i sundon të gjithë; që fshihet pas çdo fenomeni në univers. Kjo forcë është dashuria.
Kur shkencëtarët kërkonin për një teori të unifikuar të universit harruan më të fuqishmen forcë të padukshme. Dashuria është dritë që ndriçon ata që e japin dhe e marrin. Dashuria është gravitet, sepse i bën disa njerëz të tërhiqen nga të tjerë. Dashuria është pushtet, sepse shumëfishon më të mirën tonë dhe i bën njerëzit mos të humbasin në egoizmin e verbër.

Dashuria shpaloset dhe zbulon. Për dashurinë jetojmë dhe vdesim. Dashuria është Zoti dhe Zoti është dashuri.

Kjo forcë jep shpjegimin e gjithçkaje, i jep kuptim jetës. Është pikërisht ajo që kemi anashkaluar për kaq shumë kohë, mbase sepse kemi frikë nga dashuria, sepse është e vetmja energji në univers që njeriu nuk ka mësuar ende ta manipulojë.

Për t’i dhënë dashurisë vendin që meriton bëra një ndryshim të thjeshtë në ekuacionin tim më të famshëm. Nëse në vend të E = mc2 të pranojmë se energjia që shëron botën mund të përftohet nga shumëzimi i dashurisë me shpejtësinë e dritës në katror do të arrinim në përfundimin se dashuria është forca më e fuqishme që ekziston… sepse nuk njeh limite.

Pas dështimit të njerëzimit në shfrytëzimin e forcave të universit që na janë kthyer kundër është e rëndësishme që të ushqejmë një tjetër lloj energjie.

Nëse duam mbijetesën e specieve, nëse duam të gjejmë kuptimin e jetës, nëse duam të shpëtojmë botën dhe çdo gjallesë që e popullon atë, dashuria është përgjigjja e vetme.

Mbase nuk jemi ende gati të shpikim një bombë me dashuri, një pajisje të fuqishme që të shkatërrojë urrejtjen, egoizmin dhe lakminë që po gërryejnë planetin. Megjithatë, çdo individ mbart një “gjenerator” të vogël, por të fuqishëm dashurie, energjia e të cilit pret të çlirohet.

Atëherë kur të mësojmë të japim dhe marrim këtë energji universale, e dashura ime Lieserl, do të konfirmojmë se dashuria sundon mbi gjithçka; dashuria është e aftë të kapërcejë mbi çdo gjë, sepse dashuria është jetë.

Jam thellësisht i penduar që nuk kam qenë i aftë të shpreh çfarë kam në zemër, që ka rrahur për ty gjatë gjithë jetës sime. Mbase është vonë për të të kërkuar ndjesë. Por, meqë koha është relative, dua të të them se të dua. Falë teje kam gjetur përgjigjen themelore.