Duket se ka degraduar në një përplasje të dytë situata midis protestuesve dhe policisë. Protestuesit që qëndrojnë përballë Kuvendit tentuan të çanin kordonin policor. Kjo ishte përplasja e dytë me policinë pas çarjes së kordonit policor tek Kryeministria.
Protestuesit hodhën kapsolla në drejtim të policisë dhe tentuan të hiqnin mbrojtëset metalike, çka bëri që policia të hidhte gaz lotsjellës duke e shpërndarë turmën.
Fillimisht shumë të rinj ishin vendosur përballë efektivëve, me maska të thjeshta ndërsa nga pamjet shihej se në afërsi të gardhit ndodheshin edhe fëmijë, kalimtarë të rastit.
Gazi është shpërndarë në një rreze të madhe, çka ka bërë që shumë protestues janë larguar duke u strehuar dhe në baret rreth zonës.
Edhe më herët protestuesit kaluan kordonin policor dhe hipen në shkallët e Kryeministrisë, por që më pas Paloka u bëri thirrje protestuesve t’i drejtoheshin Kuvendit (lexo ketu).
Kjo është protesta e 3-të masive që zhvillon opozita e bashkuar pas asaj të 16 Shkurtit dhe të 16 Marsit, pas vendimit për të djegur mandatet e deputetëve dhe për të dalë në rrugë. Edhe në protestat e tjera kombëtare, pjesëmarrja ka qenë e konsiderueshme, ndërsa për herë të parë qytetarët grumbullohen në orët e pasdites.
Opozita kërkon një qeveri tranzitore, që të mund të çojë vendin në zgjedhje të parakohshme, pa Edi Ramën kryeministër. Vendi prej javësh ndodhet në një kolaps instyitucional, pasi ende nuk është bërë e mundur që të plotësohet numri prej 140 deputetësh që parashikon Kushtetuta e vendit.
Discussion about this post