Kryeministri i Maqedonisë së Veriut, Zoran Zaev ka deklaruar se nesër gjatë takimit të minishengenit do të diskutohet midis të tjerash edhe për bashkëpunimin mes shteteve pjesëmarrëse për të menaxhuar fatkeqësitë natyrore.
Teksa mori pjesë në një koncert bamirës për të prekurit nga tërmeti, Zaev tha në “Facebook” se Maqedonia e Veriut do të vijojë të ndihmojë Shqipërinë për rindërtimin.
“Vazhdon mbështetja e vazhdueshme për rimëkëmbjen nga tërmeti i Durrësit dhe vendbanimeve të tjera në Shqipëri. Në mbështetje të kësaj, sonte me kryeministrin Rama dhe Presidentin e Serbisë Aleksandar Vucic, ne morëm pjesë në një koncert të arias klasike të operës në Tiranë të interpretuar nga artistët më të mirë të Operës Shqiptare.
Ngjarjet tragjike sjellin humbje të pariparueshme, por këto janë momentet kur miqësia dhe ndërlidhja midis popujve mund të shprehen më së miri. Koncerti i donatorëve për të zbutur efektet e tërmetit është vetëm fillimi dhe njoftimi i një bashkëpunimi të përbashkët për menaxhimin e fatkeqësive që do të trajtohet nesër si një shtyllë e re e bashkëpunimit midis vendeve të Ballkanit Perëndimor.
Bashkëpunimi i sinqertë dhe i përkushtuar i ekipeve të shpëtimit të të gjitha vendeve fqinje menjëherë pas tërmetit tragjik është një shenjë e fortë e asaj që rajoni ynë mund të bëjë kur ne punojmë së bashku”, tha Zoran Zaev.
Së bashku me presidentin e Serbisë, Aleksandar Vuçiç, Zaev ka mbërritur në Tiranë mbrëmjen e sotme për të marrë pjesë në takimin e minishengenit që do të mbahet nesër në Tiranë.
(M. I./ Faxweb.al)
Discussion about this post