Kryeministri në detyrë i Kosovës, Ramush Haradinaj i bëri thirrje kryetarit të Lëvizjes Vetëvendosje, Albin Kurti që të reflektojë dhe t’i japë sa më shpejt një zgjidhje krizës së krijuar në vend.
Haradinaj i kërkoi Kurtit që të tregojë nëse dëshiron të shkohet drejt qeverisë teknike apo drejt marrëveshjes. Ai theksoi në një intervistë për “Ekonomia Online” se kreu i LVV nuk mund ta mbajë peng Kosovën.
“Unë pres nga z. Kurti që t’i thërrasë ndërgjegjes së vet. Ose ta gjej formulën të bëjë shumicën, në këtë rast me LDK-në, sepse unë s’jam palë e negociatave, ose të hapë rrugë. Të deklarojë çka i propozon Kosovës fituesi i zgjedhjeve në këtë rast. Le të deklarojë për çka është.
A është për një qeveri teknike, a është për një qeveri tjetër, a është për të shkuar në zgjedhje. Por diçka duhet t’i thotë Kosovës, nuk mund ta mbajë varur. Nuk po e them këtë për të nxënë ngushtë Kurtin, sepse Kosova është e zënë ngushtë. Detyra e qeverisë është të zgjidhë krizën, shiheni procesin.
Unë jam i detyruar t’i them këto për shkak se unë më së miri e di se jam kryeministër në detyrë dhe jam përgjegjës. Dhe unë po i tregoj z.Kurtit se nuk është mirë të vonohet. Të lutem mos u vono, ose krijo shumicën, ose jepi epilog kësaj gjendjeje. Sepse po rrezikojmë më shumë sesa një parti. Po rrezikojmë funksionimin e vendit”, deklaroi Ramush Haradinaj.
