Në rrugën “Las Ramblas” në Barcelonë, ku ndodhi sulmi me furgon, ka shpëtuar për çështje sekondash edhe një grua me origjinë shqiptare sëbashku me fëmijën e saj 1-muajshe.
Në një video të publikuar nga Ora News, Romina tregon se ndodhej sëbashku me vajzën e saj vetëm një muajshe, në zonën e famshme turistike “Las Ramblas”, ku një furgon shkaktoi vdekjen e 13 njerëzve dhe plagosjen e mbi 54 të tjerëve.
“Kam shpetu per 30 sekonda. Mos te kishim hyr ne dyqan kisha vdek me gjith gocen 1 muajshe”shkruan gruaja e re.
Më pas komentuesve që i gjenden pranë ajo i përgjigjet më tej “Shum flm akoma sekam mar veten tu u dridh jam” .
Jo vetëm kaq, por Romina Dervishi ka postuar dhe video nga vendngjarja: Panik, zhurma e ambulancave, helikopterë që fluturojnë lart dhe kontrollojnë zonën, njerëz që ikin të frikësuar.
“Kur te don zoti te shpeton per 50 sekonda . Faleminderit zot. “, shkruan ajo krahas videove.
Kujtojmë se një furgon u fut sot mes një turme turistësh në Barcelonë, duke shkaktuar 13 të vdekur dhe dhjetëra të plagosur.
Incidenti ka ndodhur sot në “Las Ramblas”, një rrugë e njohur e cila vizitohet nga turistët por që CIA e ka paralajmëruar si target terrorizmi. Pas aksidentit, shoferi i furgonit është larguar menjëherë nga vendngjarja.
Fillimisht u tha për një aksident, por më vonë organizata terroriste ISIS ka pranuar përgjegjësinë për sulmin e kryer.
Përplasja ka ndodhur para restorantit hebre “Maccabi”, detaj i cili ka ngritur dyshimet për një sulm me prapavijë fetare dhe racore. Sipas policisë spanjolle furgoni i cili u përdor sot për sulmin, u mor me qira nga një maroken i quajtur Driss Oukabir. Mediat lokale shkruajnë se Oukabir, e mori me qira furgonin në qytezën e Santa Perpetua de la Mogada. Mirëpo kjo nuk vërteton se është ai autori. (D.D/Shuplaka)
