Detaje të reja janë zbardhur nga ngjarja e rëndë shënuar një ditë më parë në Tepelenë, ku një 35-vjeçare dhe foshnja e saj u shkrumbuan nga flakët që përfshiu banesën e tyre, ndërkohë që mrekullisht shpëtuan kryefamiljari dhe djali 5-vjeçar që nuk ndodheshin në shtëpi.
Nga të dhënat e deritanishme, është bërë e ditur se shkak i zjarrit që përfshiu banesën në katin e parë të një pallati në Tepelenë ishte shkaktuar nga një rrjedhje gazi e bombolës.
“Ndodhi gjithçka shumë shpejt. Askush nuk arriti dot të hynte pasi flakët kishin përfshirë gjithçka. Kemi parë tmerr. Nuk e dimë cili mund të jetë shkaku, por kjo që ndodhi është një tragjedi shumë e rëndë për familjen. Ne dëgjuam një shpërthim, ç’ka mund të ketë qenë bombola e gazit,” është shprehur një banor i pallatit për “GSH”.
Sipas zjarrfikësve, 35-vjeçarja Elona Shehu është gjetur e pajetë teksa kishte mbuluar me trup foshnjën e saj në mënyrë që flakët të mos i depërtonin. Referuar ekspertizës paraprake, nëna është munduar që të shuajë flakët në rrobat e foshnjës që kishin marrë flakë. (XH.A/SHUPLAKA)
Discussion about this post