Lulzim Basha dha tre mesazhe të forta në këtë protestë të opozitës, që është parë si një rizgjim i rëndësishëm pas shumë kohe.
E vlerësuar nga shumë personazhe të njohur, madje edhe pse me karshillëk, e shpërndarë edhe nga vetë kryeministri Edi Rama, Lulzim Basha për herë të parë artikuloi qartë para të gjithëve qëllimin e tij.
Së pari, Kryeministria. Basha e tha qartë se tashmë është gati të udhëheqë shqiptarët, duke nënkuptuar se tashmë është koha e tij.
”A jemi ndryshe nga këta? PO!Sot dua të ndaj diçka me ju dhe mendoj se ka ardhur koha ta dëgjoni. Unë jam gati, jam gati t’u udhëheq në rrugën që na nxjerr nga ky kaos, drejt të ardhmes! Jam gati të ndërtoj me ju, për ju, një shoqëri të re, një të ardhme të re për cdo shqiptar të ndershëm. Po jam gati sot më shumë se kurrë!”, theksoi Basha.
Mesazhi i dytë ka të bëjë me kërkesën që është artikuluar vazhdimisht nga ai, gjatë ditëve të fundit: Zgjedhje të lira dhe të ndershme.
”Ne do të qëndrojmë këtu, në këtë shesh derisa të sigurojmë njëherë e mirë zgjedhje të lira dhe të ndershme, nuk do lejojmë zgjedhje fasadë të kapur nga droga dhe krimi…Ose do bëjmë zgjedhje të lira, ose zgjedhje nuk do të ketë! Rrugë të mesme nuk ka!”, theksoi më tej kryedemokrati.
Mesazhi i tretë ka të bëjë me qeverinë teknike.
”Unë do të qëndroj këtu në këtë shesh, u ftoj të gjithëve të qëndrojmë së bashku për të realizuar zgjedhje të lira dhe të ndershme dhe një qeverie teknike të zgjedhjeve të lira. Ky është vendimi im, a është ky vendimi i të gjithëve këtu sot?”, përfundoi Basha. (V.G/SHUPLAKA)
Discussion about this post