Turpi europian mbi Kosovën 

Nga Klodian Tomorri

Sjellja e Bashkimit Europian ndaj Kosovës është e turpshme. Nuk ka rast tjetër në historinë botërore ku viktima të përndiqet më shumë se agresori.

Prej vitesh ish-drejtuesit e UÇK hetohen dhe thirren nëpër gjyqe me akuza të turpshme si kriminelë lufte. Ndërsa i njëjti Bashkim Europian avancon përpara me shpejtësi Serbinë në proceset integruese.

A thua se Srebrenicën e bënë shqiptarët? A thua se genocidin mbi popullsinë civile dhe spastrimet masive etnike i bënë shqiptarët.

Serbët me mbështetjen e rusëve, por jo vetëm, lobojnë fort dhe ja kanë dalë me sukses të fshijnë gjurmët e krimeve makabre që kanë kryer. Vetëm pak ditë më parë Rusia vuri veton në OKB duke rrëzuar rezolutën që shpallte masakrën e Srebrenicës genocid.

Nga ana tjetër, udhëheqësit e UÇK-së arrestohen dhe kalojnë nga një proces gjyqësor në tjetrin, deri edhe në gjykata të çuditshme. E gjitha kjo me qëllimin e vetëm për të njollosur luftën çlirimtare të kosovarëve dhe për ta shpallur UÇK-në një organizatë terroriste.

Por e vërteta është se lufta për liri e shqiptarëve të Kosovës është një faqe e ndritur në historinë e kombit shqiptar.

Shqipëria duhet të ngrejë zërin fort në çdo organizatë ndërkombëtare ku aderon dhe ka zë për t’i dhënë fund një herë e përgjithmonë këtij skenari të qëllimshëm dhe kriminal që synon të njollosë shqiptarët.

Sado të përpiqet Serbia dhe të gjithë miqtë e saj fanatikë, shqiptarët nuk kanë qenë kurrë në historinë e tyre një komb kriminelësh. Nuk ka në historinë e largët apo atë të afërt një rast ku shqiptarët të kenë kryer krime apo masakra mbi popullsitë civile të asnjë kombësie.

Këtij kombi vetëm i kanë rënë në qafë dhe të vetmet raste që ka shkrehur armë, ka qenë kur i kanë cënuar integritetin territorial dhe i është dashur të mbrohet nga uzurpatorët. Këtë duhet ta ketë të qartë çdo shtet zuzar brenda apo jasht BE-së.