Një shtetas grek u ndalua dje në aeroportin e Rinasit, pasi në bagazhin e tij u zbulua një pajisje e dyshimtë, e ngjashme me atë të izraelitit që u ndalua para disa kohësh.
Shtetasi i identifikuar si Iraklis Dragounis, 52 vjeç, u ndalua në momentin që po kalonte skanerin, e pastaj do të linte Shqipërinë.
Oficerët e policisë informuan prokurorinë, e cila vendosi t’i bllokojë pasaportën inxhinierit grek 52-vjeçar, derisa të sqaroheshin rrethanat e çështjes, ndërsa pajisja që dyshohet se kryen përgjime, do t’i nënshtrohet ekspertizës.
Draugunis është shoqëruar më pas në ambientet e drejtorisë së Policisë Tiranë, ku ka dhënë shpjegime të detajuara për hetuesit.
Iraklis Dragounis ka deklaruar se kishte ardhur në Shqipëri, pasi ishte kontraktuar nga një kompani celulare për të detektuar antenat e saj, nëse kishte ndërhyrje. Ai ka refuzuar të deklarojë emrin e kompanisë, pasi ai e konsideron si sekret tregtar dhe që binte ndesh me marrëveshjen e bërë me kontraktuesin, raporton BW.
Ai është shprehur se aktiviteti i tij është i ligjshëm, dhe se kompania që drejton është e regjistruar në Qipro.
Shtetasi grek mësohet se ka hyrë në Shqipëri edhe të paktën 10 herë të tjera.
Ndalimi i Iraklis Dragounis, vjen pak javë pasi po në Rinas u ndalua izraeliti Yoram Frig. (M.D/Shuplaka)
Discussion about this post