Prokuroria pranë Gjykatës së Shkallës së Parë të Juridiksionit të Përgjithshëm, Gjirokastër ka regjistruar dy procedime penale të ndara në lidhje me vepra që lidhen me procesin zgjedhor dhe cënimin e tij.
Procedimi i parë, i regjistruar më 23 prill 2025, ka të bëjë me veprën penale “Dëmtimi me dashje i materialit zgjedhor”, sipas nenit 326/a të Kodit Penal.
Kallëzimi është bërë nga një prej anëtarëve të ZAZ Dropull, i cili ka raportuar mungesën e vulës zyrtare të kësaj zone zgjedhore. Grupi hetimor është ngritur dhe po punon me përparësi për zbardhjen e rrethanave.
Ndërkohë, po në të njëjtën ditë, është regjistruar procedimi penal për veprën penale “Kanosja apo dhunimi ndaj pjesëmarrësve në zgjedhje”, bazuar në kallëzimin e shtetasit E.S. Ky i fundit pretendon se është kërcënuar nga shtetasi A.M. përmes rrjeteve sociale, pas qëndrimeve të tij publike në lidhje me një subjekt zgjedhor. Sipas kallëzimit, janë përdorur gjuhë kërcënuese dhe imazhe intimiduese.
Prokuroria e Gjirokastrës vijon hetimet për të dyja çështjet dhe shpreh angazhimin për të vënë përpara përgjegjësisë ligjore çdo person që cënon zgjedhjet e lira dhe sistemin demokratik.
