Ministri i Drejtësisë, Petrit Vasili, ka pritur sot drejtuesit e lartë të USAID, gjatë një takimi të zhvilluar me ta, ku ka vlerësuar mjaft pozitivisht bashkëpunimin e deritanishëm. Ai është shprehur se edhe personalisht, ka një histori të gjatë bashkëpunimi me USAID, që daton 20 vjet më parë.
Gjatë diskutimit, drejtuesit e USAID prezantuan dhe analizuan ecurinë e njërit prej projekteve kryesore që ka asistuar sistemin e drejtësisë vitet e fundit, “Drejtësi për të gjithë”. Gjatë takimit, këta përfaqësues vunë theksin tek rëndësia e efikasitetit në gjykata, marrja dhe dhënia e një drejtësie pa vonesa, transparenca në ofrimin e shërbimit publik në gjykata, etj.
Gjatë diskutimit u vu theksi tek procesi i regjistrimit audio dhe roli i përfshirjes së Shoqërisë Civile në proceset reformuese të drejtësisë. “USAID ofron mbështetje teknike për 23 shoqata që po monitorojnë ecurinë e procesit të reformës në drejtësi”, theksuan drejtuesit e USAID, duke shtuar se sa i takon raportimit investigativ, po punohet me gazetarët vendor lidhur me përmirësimin e hetimit investigativ.
Edhe ministri Vasili theksoi se garancia e kapaciteteve të raportimit investigativ ka shumë rëndësi dhe nëse ky raportim nuk është profesional, ka rrezik të krijohen problematika në drejtim të perceptimit negative të publikut.
“Raporti në koalicionin e OJF-ve që do të monitorojnë reformën do të ishte mire të ndërlidhej edhe me organizatat e profesionistëve. Rolin e tyre e shoh si mbështetje dhe jo thjesht monitorues. Çështja është që të mos mjaftohen me informacione që janë publike dhe lehtësisht të aksesueshme, por të jetë pjesë aktive.” (XH.A/SHUPLAKA)
