Kryeprokurori Adriatik Llalla ka pritur sot në ambientet e Prokurorisë së Përgjithshme ministrin e Drejtësisë, Petrit Vasili. Ky takim është mbajtur në kuadër të rekomandimeve të Kryeministrisë për Prokurorinë për këtë vit.
Ministri Vasili ka dorëzuar rekomandimet mbi politikën penale, duke renditur çështjet kyçe ku ka pakënaqësira dhe ka nevojë për ndërhyrje.
Fillimisht, ai ka dhënë një vlerësim të përgjithshëm për bashkëpunimin mes këtyre strukturave, duke e cilësuar efikas , teksa ka theksuar se shpejtësia është gjëja më e rëndësishme në komunikim.
“Synimi ynë është forcimi i bashkëpunimit me Prokurorinë. Në 2017-ën si prioritet kemi luftën kundër krimit të organizuar, veçanërisht ndaj lëndëve narkotike dhe korrupsionit. Çështjetë tilla si droga, pastrimi i parave, korrupsioni, kërkojnë përgjigje të menjëhershme dhe të drejtpërdrejta.
Trafikimi i lëndëve narkotike është një problematikë mjaft shqetësuese. Kërkohen metoda special hetimi, ngritje të grupeve të përbashkëta hetimore. Prokuroria të kryejë hetime financiare brenda dhe jashtë vendit. Jemi të pakënaqur në pikën e bashkëpunimit mes Policisë së Shtetit dhe organeve ligjzbatuese që kërkon përmirësim. Duhet të ruhet sekreti hetimor, kurdo kur ky sekret hetimor cenohet, cilësia e hetimit bie shumë.”, u shpreh ndër të tjera ministri Vasili.
(XH.A/SHUPLAKA)
