Lëvizja Vetëvendosje ka akuzuar qeverinë se po mbron veglat e saj në çështjen e vdekjes të një prej aktivistëve të arrestuar nga qeveria, Astrit Dehari.
Reagimi i kësaj partie politike erdhi pas një komunikate të lëshuar nga qeveria kosovare, e cila dënonte veprimin e Vetëvendosjes për “përpjekjet e ulëta ndaj 12 qytetarëve, të cilët ushtrojnë detyra në institucione dhe në medie të Kosovës”.
I menjëhershëm ka qenë reagimi i Vetëvendosjes, e cila shprehet se qeveria nuk ka dhënë asnjëherë llogari për politikat e gabuara të saj që kanë dobësuar Kosovën dhe “sot i cilëson qytetarë 12 fajtorët për vdekjen e dhunshme Brenda burgut të Astrit Deharit.”
“Qytetarët e Kosovës nuk janë kriminelë me pushtet. Qytetarët e Kosovës janë të papunë, janë punëtorë pa të drejta e të abuzuar, janë fëmijë e të rinj me arsim jocilësor e pa të ardhme, janë luftëtarët e UÇK-së që shohin se si disa komandantë po e shesin luftën, jemi të gjithë ne, që e vuajmë përditë arrogancën dhe dhunën e pushtetit policor, që e vuajmë rrenën e shpifjen e kanaleve zyrtare e jozyrtare mediatike të pushtetit, që e vuajmë padrejtësinë që e prodhon një sistem i diskredituar gjyqtarësh e prokurorësh, të gjithë papërjashtim në shërbim të “klanit pronto” dhe të servilave të tyre nga LDK.
Ndaj ne kërkojmë drejtësi për Astritin, sepse pa vënë drejtësi për Astritin, atëherë këta 12 funksionarë bashkë me shefat e tyre do të shkaktojnë Astritë të tjerë.”, shprehet ndër të tjera Vetëvendosje, e cila bën me dije se këto shpifje do të përballen me organizime popullore.
