Jemi në prag të nisjes së fushatave elektorale edhe cilado nismë e marrë nga instancat partiake sado fisnike të duket lë vend për dyshime. E pensionistët janë një nga kategoritë që përherë në periudha të caktuara vendosen në qendër të vëmendjes.
Pas rritjes së pensionit që parashikohet të nisë pas datës 1 mars, një tjetër shërbim do të jetë më i mirë për pensionistët. Kafja për pensionistët do të jetë vetëm 20 lekë. Kjo ka qenë një nismë e ndërmarrë edhe më parë kur Bashkia e Tiranës drejtohej nga kryemiministri i tanishëm Edi Rama.
“Jam shumë entuziast që po e filloj mëngjesin me Selimin dhe kolegët e tjerë, për këtë nismë të Bashkisë së Tiranës. Është një nismë e cila në fakt është filluar Edi Rama kur ka qenë kryetar bashkie, por u la në harresë 4 vjet. Sot e rikthejmë prapë dhe nisma quhet: “Kafe me gjyshin”, ose me gjyshen, dhe është një rrjet kafenesh në të gjithë Tiranën që nga ora 7 deri në orën 9 të mëngjesit, të cilat do ta shërbejnë kafen me 20 lekë, për të ndihmuar të gjithë ata që janë pensionistë”, tha Veliaj.
Ai bëri të ditur se nga kjo nismë do të përfitojnë të gjithë pensionistët, ndërsa theksoi se kësaj nisme i janë bashkuar fillimisht një rrjet prej 100 lokalesh në gjithë kryeqytetin. “Mjafton që dikush të tregojë librezën e pensionit dhe i gjithë rrjeti i kafeve ku është vendosur tabela “Kafe me gjyshin” do të jetë një vend ku kafja do të kushtojë 20 lek. Aty mund të konsumohet shtypi i ditës edhe sigurisht bisedat e para të ditës me secilin. Ne do të kemi një rrjet prej 100 kafenesh në të gjithë Tiranën që do të jenë pjesë e kësaj nisme”, bëri të ditur kryebashkiaku. (E.K/SHUPLAKA)
