Prokuroria pranë Gjykatës së Shkallës së Parë të Juridiksionit të Përgjithshëm në Gjirokastër ka reaguar pas ngjarjes tragjike të ndodhur më 20 prill 2025, ku një 15-vjeçar u gjet i vetëvarur pranë banesës së tij në fshatin Valare.
Pas njoftimit nga Komisariati i Policisë Gjirokastër, u ngrit menjëherë një grup hetimor me urdhër të drejtuesit të Prokurorisë, ku janë kryer veprime hetimore në vendin e ngjarjes, përfshirë këqyrjen e vendit, sekuestrimin e telefonit, kompjuterit dhe materialeve shkollore të të miturit, si dhe marrjen e deklarimeve nga persona që kanë dijeni për rrethanat.
Sipas njoftimit zyrtar, nga hetimet e deritanishme nuk ka asnjë provë që të tregojë se vetëvrasja e të miturit ka ardhur si pasojë e ngacmimeve apo bullizmit nga bashkëmoshatarët.
Prokuroria thekson se hetimet për zbardhjen e plotë të ngjarjes dhe trajtimin e rastit nga institucionet përgjegjëse po vijojnë me përparësi të veçantë.
