Ka nisur procesi i Vetingut dhe në Prokurorinë e Përgjithshme. Pa frikë mund të themi se kjo do të jetë dhe prova e zjarrit, pasi në shqyrtim pritet të jenë dosjet më të nxehta të 2 dekadave të fundit.
Komisioni i Pavarur i Kualifikimit ka përzgjedhur 15 dosje për tre prokuroret Arqile Koçaj, Artur Selmani dhe Sokol Stojani.
Të tre këta nuk janë emra të panjohur, dhe duket se procesi i Vetingut do të kalojë “provën e zjarrit”. Koçaj dhe Selmani kanë qenë më herët dhe kandidatë për të zënë vendin e kreut të Përgjthshëm të Prokurorisë.
Tashmë Arqile Koçaj është emëruar në krye të Njësisë së Dekriminalizimit në institucionin qendror të akuzës.
Ndërkohë prokurori i tretë i zgjedhur për të kaluar procesin e Vettingut është Sokol Stojani. Ky prokuror ka pasur nën hetim dy dosje mjaft të nxehta, siç ishte ajo e Gërdecit ku mbetën të vrarë 26 persona. Po ashtu së bashku me Sokol Malajn, Stojani ka qenë dhe në krye të hetimeve për 21 Janarin.
Më tej ai ka marrë postin e Drejtorit të Zyrës së Hetimit dhe Kontrollit të Ndjekjes Penale në Prokurorinë e Përgjithshme, post i cili iu besua nga ish-kryeprokurorja Ina Rama. Asokohe ai u përfol në media dhe si krahu i djathtë i saj.
Pas ardhjes në detyrë të Ardiatik Llallës, Stojani është zhveshur nga postet drejtuese, duke mbetur prokuror.
Artur Selmani nga ana tjetër u bë hit në rrjet në kohën kur kandidonte për postin e kryeprokurorit pasi në deklaratën e tij të pasurisë, kishte disa mijëra euro që justifikoheshin si të ardhura nga llotot.
(E.K/FAXWEB)
Discussion about this post