“Do të sjell kuksianët nga Londra që kanë sharë më shumë projektin”. Kështu ishte shprehur kryeministri Edi Rama për fluturimin e parë në Aeroportin e Kukësit. Por ajo që binte në sy në një prej bisedave të Ramës me “çunat e Londrës” ditën e diel ishte fakti se një prej tyre dukej më shumë vlonjat nga dialekti se sa kuksian.
Por ministrja Balluku mohoi çdo gjë, duke thënë se personi në fjalë jo vetëm që ishte kuksian, por i kishte shpjeguar asaj dhe lumenjtë që ishin në zonë.
Pavarësisht deklaratave të Ballukut, që tentojnë të lajnë sadopak imazhin e një fluturimi eksperimental, të gjithë e dëgjuan me veshët e tyre, sesi i riu i shitur si kuksian, në fakt kishte theks qartësisht të pastër jugor.
Blendi Fevziu: Ju ishin në avion zonja Balluku, por çunat e Kukësit pse flisnin me theks vlonjat?
Belinda Balluku: Të them të drejtën po të isha në vendin e gazetarëve do kërkoja një listë të pasagjerëve dhe do i nxirrja çunat, se çunat ishin të gjithë kuksian. Dhe unë kalova dhe një test se ai që ju thoni që fliste si vlonjat më pyeste për lumenjtë, ku jemi këtu sepse unë nuk i njoh lumenjtë e Kukësit nga sipër. Ai më thoshte që këtu jemi në Shtinje, këtu jemi aty.
Blendi Fevziu: Çunat e Kukësit i sollët dhe i latë në Kukës? Si do kthen ata apo me linja të tjera?
Belinda Balluku: Ata i lamë atje sepse siç ka premtuar Kryeministri do votojnë për Partinë Demokratike. Ata besoj që nën patronazhimin tonë duhet të votojnë PD-në siç është premtuar.