Vrasja e dy personave në Gjermani

Policia gjermane ka nisur një operacion të madh për gjetjen e një apo më shumë sulmuesve të armatosur, të cilët vranë dy persona në qytezën e Bad Nauheim, një ditë më parë.

Sipas një njoftimi të policisë, trupat e viktimave, të dy të vrarë me armë zjarri, u gjetën para një adrese banimi në këtë qytet të vogël, i cili ndodhet 25 kilometra në veri të Frankfurtit. Viktimat janë zbuluar pasdite të shtunën dhe ende nuk janë zbuluar detaje të tjera rreth identitetit të tyre.

Policia ka angazhuar një forcë të madhe policore, që përfshin edhe oficerë civilë, forca speciale, si dhe helikopterë, për të gjetur sulmuesit dhe zbardhur motivin e këtij krimi të rëndë.

Pavarësisht përmasave të operacionit, autoritetet kanë theksuar se, bazuar në informacionet e deritanishme, nuk ka rrezik për qytetarët e zonës.

Ndërsa hetimet vazhdojnë, autoritetet ende nuk kanë arritur të përcaktojnë motivimin e këtij krimi dhe rrethanat që kanë çuar në vrasjet e dy personave. Prokurorët dhe hetuesit janë duke punuar për të zbuluar më shumë detaje dhe për të siguruar drejtësi për viktimat.

Bad Nauheim, një qytet i njohur historikisht për lidhjet me Elvis Presley, i cili e kaloi pjesën më të madhe të shërbimit të tij ushtarak aty, po përballet me këtë tragjedi që ka tronditur komunitetin lokal.