Vrasja e 35-vjeçares në QKUK u dënua me fjalët më të ashpra edhe nga udhëheqësit e partive politike, ndërsa Rrjeti i Grupeve të Grave paralajmëroi protesta për të enjten në Prishtinë.
Një 35-vjeçare nga Lipjani është vrarë më 30 nëntor në oborrin e Qendrës Klinike Universitare të Kosovës. Gruaja me inicialet H.M. dyshohet se u vra nga ish-bashkëshorti në oborrin para Klinikës së Gjinekologjisë derisa kishte dalë për një shëtitje.
Policia tha se bashkë me prokurorinë po kryejnë hetime për të ndriçuar rrethanat dhe motivet e mundshme të vrasjes dhe për momentin nuk ka të arrestuar lidhur me rastin.
Kryetari i Lipjanit tha se 35-vjeçarja e lindur në Lipjan ishte martuar në Shtime. Ai tha se viktima ishte më e vogla e shtatë motrave, derisa sipas tij institucionet kanë qenë të njoftuara për rastin e saj.
Ahmeti tha se çifti ishin ndarë para 5-muajsh, derisa tashmë e ndjera pas divorcit kishte jetuar në shtëpinë e agjës pasi nuk kishte as baba e as agjallarë.
Motra e viktimës poashtu tha se autoritetet kanë qenë të njoftuara për shkurorëzimin e 35-vjeçares dhe problemet me ish-bashkëshortin.
Ajo tha se familjarët e burrit i cili dyshohet se e ka vrarë gruan e tij, e kanë lutur motrën e saj të kthehet në shtëpi.
Një tjetër familjarë i tashmë të ndjerës thotë se çifti kishin qëndruar të martuar për rreth 4 muaj dhe se ndarja kishte ardhur edhe me intervenimin e shtetit.
Nazlie Bala nga Ministria e Drejtësisë, në Radio Dukagjini, ka thënë se gruaja shtatzënë e cila u vra këtë të mërkurë, kishte kërkuar ndihmë edhe më parë në institucione përkatëse.
Bala, tha se institucionet e sigurisë duhet ta shtojnë përgjegjshmërinë, dhe viktimave të dhunës t’u jepet përkrahja e plotë.
Ajo theksoi, se lufta ndaj fenomenit të dhunës duhet të jetë e gjithë shoqërisë dhe të mos reduktohet vetëm në institucione. Balaj ka thënë se gruaja shtatzënë e cila u vra të mërkurën mbrëma nga bashkëshorti me të cilin ishte në proces të ndarjes, ka pasur urdhër-mbrojtje nga Gjykata Themelore në Ferizaj.
“Sipas informacioneve që i kemi e ndjera ka pasur urdhër-mbrojtje nga Gjykata Themelore në Ferizaj”, ka thënë ajo.
Deputeti i LVV-së, Haki Abazi ka kërkuar dorëheqjen e ushtruesit të detyrës drejtorit të Policisë së Kosovës, Fehmi Hoti nëse konfirmohet se rasti ka qenë i lajmëruar në polici.
“Unë mendoj që drejtori i Policisë sonte duhet të jap dorëheqje. Si deputet po e them me plot përgjegjësi, nëse rasti ka qenë i lajmëruar në polici”, ka deklaruar Abazi në RTV Dukagjini.
Vrasja e shtatzënës nxiti reagime të ashpra në Kosovë. Kryeministri Albin Kurti, tha se kjo ishte vrasje mizore, “e papranueshme dhe e padurueshme”. Presidentja e Kosovës, Vjosa Osmani, tha se duhet t’i jepet fund “valës kriminale” dhe “femicidit” ndaj grave, teksa kërkoi drejtësi për viktimat e dhunës.
Liderët e subjekteve opozitare poashtu reaguan ashpër duke kërkuar reagimin e menjëhershëm të shtetit dhe shoqërisë ndaj këtyre akteve makabre. Kolektivi Për Mendim dhe Veprim Feminist do të mbajë të enjten në Prishtinë protesta për të kërkuar që vrasjet e grave nga burrat të trajtohen si urgjencë kombëtare.
Kjo është vrasja e dytë e grave në një javë në Kosovë. Më 25 nëntor një burrë vrau gruan e tij në Prishtinë. Të dyja vrasjet ndodhën ndërsa në Kosovë po mbahet një fushatë 16 ditëshe kundër dhunës ndaj gruas me moton “as edhe një më shumë”. Policia e Kosovës tha se nga janari i këtij viti e deri në muajin tetor, janë shënuar dy mijë e 273 raste të dhunës në familje.
Discussion about this post