Kryeministri i Serbisë, Aleksandar Vuçiç, ka akuzuar faktorin ndërkombëtar dhe shqiptarët si përgjegjës të përçarjeve brenda Listës Serbe. Këto akuza, ai i bëri gjatë një takimi që zhvilloi me përfaqësues të serbëve në Kosovë.
Mësohet se Vuçiç ka bërë thirrje që të gjendet një gjuhë e përbashkët për të ndalur grindjet e përçarjet mes tyre. Në takim ishin të pranishëm drejtori i Zyrës për Kosovën, Marko Gjuric, deputetët e Listës Serbe, zëvendëskryeministri Branimir Stojanovic, ministri Dalibor Jevtic dhe ministri i shkarkuar Ljubomir Mariq.
Kreu i Qeverisë serbe foli bindshëm se do i japë fund konfliktit në Listën Serbe që ka ardhur nga “faktori i huaj dhe natyrisht faktori shqiptar”.
“Disa njerëz i kanë dhënë vetes të drejtën për të bërë diçka që është kundër interesave të Republikës së Serbisë. Kjo histori do të marrë fund sot.”, mësohet të ketë thënë Vuçiç. (XH.A/SHUPLAKA)
