Kreu i Shërbimit informativ të Shtetit Visho Ajazi ka uruar me një mesazh punonjësit e shërbimit inteligjent me rastin e festive të fundvitit. Njëkohësisht ai ka informuar vartësit e tij për qëllimin e vizitës në Tiranë të John O Brennan, drejtorit të CIA-s.
Bëhet e ditur se drejtori i CIA-s ka falenderuar SHISH-in për punën në drejtim të luftës kundër terrorizmit dhe angazhimit të treguar në fushën gjeostrategjike kundër spiunazhit rus, i evidentuar me prezencën e tij të shtuar në vendet e rajonit. Shqetësim i ngritur gjatë diskutimit ka qenë ardhja në pushtet e kandidatëve prorusë, si në Bullgari, edhe Moldavi, kontaktet e Rusisë me elitën politike në Maqedoni.
Gjatë takimit mes Ajazit dhe Brennan është vënë në pah suksesi dhe bashkëpunimi që SHISH ka pasur me CIA-n në luftën ndaj rrezikut islamik dhe ndikimit rus.
“Sukseseve të këtij viti u janë shtuar edhe dy ngjarje domethënëse për një Shërbim Informativ. Dekorimi i Shërbimit Informativ Shtetëror (SHISH), në datën 04.07.2016, nga Presidenti i Republikës, Sh. T. z. Bujar Nishani, me Dekoratën e Artë të Shqiponjës, të cilën e kemi njoftuar zyrtarisht më parë. Vizita e suksesshme zyrtare në SHISH, e datës 06.12.2016, në përgjigje të ftesës së Drejtorit të SHISH, z. Visho Ajazi Lika, e Drejtorit të Agjencisë Qendrore të Zbulimit të SHBA (CIA), z. John O. Brennan, i shoqëruar nga zyrtarë të lartë të agjencisë së tyre.
“Këto përbëjnë bazë solide për arritje rezultatesh të larta, në luftën kundër çdo veprimtarie që cenon sigurinë kombëtare. Duke ju përgëzuar për punën dhe përpjekjet e vitit 2016, për kontributin tuaj në forcimin e mëtejshëm të kohezionit ndërinstitucional shqiptar, dhe rritjen e reputacionit ndërkombëtar të institucionit tonë, shpreh bindjen se veprimtaria e SHISH-it, edhe gjatë vitit 2017 do të vazhdojë me modesti, por pa u lëkundur. –tha kreu i SHISH. (MD/SHUPLAKA)
Discussion about this post