Kanë dalë detaje të reja nga operacioni i përbashkët policor shqiptar, italian dhe ai malazez, ku u finalizua me sekuestrimin e një gomoneje në Bari me 885 kilogramë drogë.
Dy shqiptarët përkatësisht K.B., 52 vjeç dhe B.A., 39 vjeç, të dy nga Vlora, mësohet se kishin kaluar kufirin me pasaportë të rregullt si këmbësor.
Por policia kufitare që ka sinjalizuar Policinë e Malit të Zi, duke i vënë në dijeni për dyshimet ndaj këtyre dy shtetasve se mund të merreshin me trafik droge. Kaq mjaftoi që homologët malazezë t’i mbanin dy shqiptarët në vëzhgim deri sa ata kanë shkuar në det ku kanë marrë gomonen me drogë dhe janë nisur për Itali. Gomonia me drogë u nis nga Mali i Zi.
Mjeti i lundrimit u pikas dje rreth orës 19:00, ndërkohë që Guardia di Finanza iu bëri shenjë skafistëve të ndalonin, por këta të fundit nuk iu binden urdhrit. Shqiptarët janë arrestuar nga policia italiane në një banesë dhe ishin të lagur. (J.V/Faxweb)
Detaje të policisë
Sqarim i Policisë së Shtetit për operacionin antikanabis Shqipëri – Mali i Zi – Itali
Gomonia me drogë, e nisur nga Mali i Zi, që u kap në Foxhia të Italisë falë një operacioni ndërkombëtar u iniciua nga një informacion i Policisë shqiptare.
Shtetasit me iniciale A.B. 40 vjeç dhe K.B., 53 vjeç nga Vlora të arrestuar në flagrancë për trafik ndërkombëtar narkotikësh, kanë kaluar në datë 22 janar 2018, në orën 14:42 minuta dhe 15:34 në Pikën e Kalimit kufitar të Muriqanit drejt Malit të Zi.
Bazuar në informacionet për implikim të mundshëm në aktivitet kriminal, Policia shqiptare njoftoi homologët malazeze për lëvizjet e dy të dyshuarve.
Ata u mbajtën nën vëzhgim për 3 ditë me radhë në territorin e Malit të Zi.
Me daljen e gomones në det u angazhuan forcat e Guardia di Finanzas dhe policitë kufitare të 3 vendeve si dhe Frontex. Pas disa orë ndjekje, trafikantët kanë hedhur në det lëndën narkotike dhe janë larguar duke tentuar arratisjen, por pa sukses.
Vijojnë hetimet për zbardhjen e rastit të trafikimit ndërkombëtar të narkotikëve.
