Zbulohet parcela me kanabis në Krujë, arrestohet 20-vjeçari që po i vadiste

Një i ri është vënë në prangat e policisë, pas kontrolleve antikanabis të zhvilluara në Krujë.

Finalizohet operacioni policor i koduar “Bruz-Mali”.

U kap në flagrancë duke vaditur bimët narkotike, vihet në pranga 20-vjeçari.

Asgjësohen me anë të djegies 124 bimë të dyshuara cannabis sativa, të kultivuara në një zonë të pyllëzuar.

Në vijim të kontrolleve intensive të territorit, për parandalimin, evidentimin dhe goditjen e veprimtarisë kriminale në fushën e kultivimit të bimëve narkotike dhe në bazë të informacioneve të grumbullara në kuadër të procedimit penal të referuar nga Policia e Krujës në Prokurorinë pranë Gjykatës së Rrethit Gjyqësor Krujë, u organizua dhe u finalizua operacioni policor i koduar “Bruz-Mali”.

Në kuadër të operacionit u bë kapja në flagrancë e 20-vjeçarit E. E., duke vaditur 124 bimë të dyshuara narkotike, të kultivuara në një zonë të pyllëzuar, në territorin e fashtit Bruz – Mal,   Krujë.

Në përfundim të veprimeve u bë arrestimi i shtetasit E. E, 20 vjeç, banues në fshatin Halil, Krujë.

Bimët narkotike janë asgjësuar nga shërbimet e Policisë, me anë të djegies.

Materialet i kaluan Prokurorisë pranë Gjykatës së Rrethit Gjyqësor Krujë, për veprime të metejshme, për veprën penale “Kultivimi i bimëve narkotike”.