Propozimi i kryedemokratit Lulzim Basha për të djegur mandatet e deputetëve të tij, duket se do të sjellë një situatë të re politike në vend. Zëra thonë se mund të ketë dhe zgjedhje të parakohshme, po ende nuk ka një datë se kur do të merret vendimi final dhe në strukturat e PD-së. I ftuar në studion e Fax News, ish-deputeti Arben Ristani u shpreh se kjo ishte e vetmja rrugë që i ngelej opozitës.
I pyetur nga Kastriot Çipi nëse është PD gati për zgjedhje të parakohshme, Ristani u shpreh se më e rëndësishme është krijimi i kushteve për zgjedhje të lira. Dy bashkëbiseduesit hodhën tezën se Rama mund të shpallë që nga e enjtja zgjedhjet e parakohshme, për ti dhënë fund krizës politike.
“Kërkohet krijimi i kushteve për të pasur zgjedhje të lira dhe të ndershme, me Ramën në pushtet kjo nuk mund të ndodh. Opozita nuk mund të kapet në befasi nga zgjedhjet e parakohshme, pasi prej kohësh po përgatitet me strukturat dhe me bazën”, u shpreh Ristani.
Më tej anëtari i kryesisë së PD-së u shpreh se në gjykimin e tij për Shqipërinë nuk është problem sistemi zgjedhor, më shumë sesa kapja që i bëhet zgjedhjeve nga ana e politikëes.
“Unë besoj se të gjitha sistemet janë të kolauduara ndërkombëtarisht dhe janë demokratike. Nëse ka garanci se zgjedhjet janë të lira dhe krijohen të gjitha kushtet, sistemin është kollaj që ta ndryshojmë dhe ta bëjmë si të duam. Unë kam qenë në shumë takime që ka zhvilluar zoti Basha me aleatët, dhe ata bjenë dakord me këtë”, tha Ristani, ndërsa shtoi se nga dita e sotme mund të nisë mbledhja e strukturave drejtuese në PD.
Kujtojmë se derimë tani kryeministriu Edi Rama nuk ka një reagim për djegien e mandateve të PD-së, dhe nuk dihet qëndrimi që mazhoranca do të mbajë.
I vetmi reagim nga socialistët ishte ai i ministres Elisa Spiropalit, e cila shprehej: “Lulzim Basha tha se do digjte qeverinë dhe paska vendosur të djegë opozitën! Sinqerisht nuk do ta dëshironim kurrsesi degradimin e tyre konstant, po në këto kushte, duhet pohuar kjo e keqe e ka një të mirë: Nuk do t’i marrin më rrogat për ta ndotur Parlamentin me baltë e bojë”.
(E.K/FAXWEB.AL)
Discussion about this post