Kongresi elektoral i Partisë Socialiste i mbajtur sot në Pallatin e Sportit “Ramazan Njala” në Durrës, u hap nga deputeti socialist Erion Braçe.
Në fjalën e tij, Braçe u shpreh se ndërtimi i Shqipërisë do të nisë nga Reforma në Drejtësi, e cila është rruga që do të sigurojë një Shqipëri më të drejtë për të gjithë qytetarët. Pas premtimeve për betejë kundër krimit, drogës, ai u ndal tek shanset e barabarta në ekonomi, ndihmesën ndaj familjeve në nevojë dhe rritjen e punësimit.
“220 mijë vende pune është angazhimi ynë që del nga ky kongres. Ne do të luftojmë për cdo vend pune për të rinjtë. 183 mijë vende të reja punë në 4 vite dhe në fund të mandatit tjetër me 220 mijë vende të reja pune do të ulim papunësinë në nivelin njëshifror”, deklaroi ai.
Por një studim i fundit i INSTAT nxjerr në pah se gjatë vitit të 2016-ës, 30% e studentëve kanë rezultuar se nuk ndiqnin shkollën, as ndonjë formim profesional dhe as nuk ishin në punë. Sipas të dhënave të INSTAT, forca e punës në grupmoshën 15-29 vjeç përbëhet nga 651 mijë persona. Nga të cilët, mbi 31 mijë persona janë vetëm me arsim fillor, 259 mijë me arsim 8-9-vjeçar, 237.2 mijë me arsim të mesëm dhe 124 mijë me arsim të lartë.
Kujtojmë se qeveria premtoi gjatë këtyre katër viteve 300 mijë vende pune, veç kësaj u ndërmorrën reforma në fushën e arsimit, konkretisht në atë profesional.
(XH.A/SHUPLAKA)
