“450 milionë euro, sistemet i kemi përtokë dhe të dhënat sheshit”, Progni denoncon AKSHI-n dhe Kadastrën

Eksperti i IT-së, Gent Progni vazhdimisht ngre akuza mbi ato që i quan abuzime nga institucionet, kryesisht nga AKSHI dhe Kadastra.

Ditën e djeshme dhe sot, Progni ka shpërndarë dy emaile nën emrin Drejtoreshës së AKSHI-t, Mirlinda Karcanaj. Eksperti akuzon Karcanajn se nëpërmjet një urdhri detyron punonjësen e saj, që të jepen certifikata nga Kadastra.

Eksperti i IT-së publikon “emailin e drejtoreshës së AKSHI-t dërguar punonjëses së Kadastrës”: Asnjë nga pronat e certifikuar

Në intervistën në FaxNews, për gazetaren Rovena Neziri, Progni thotë se në faqen e tij të webit “Whistleblower”, e cila është e mbrojtur nga Konventa e Gjenevës, vijnë denoncime të shumta nga persona anonimë, por që mund të kenë informacione apo të dhëna rreth problematikave të ndryshme.

Ndonëse, publikoi këto emaile, Progni thotë se nuk ka pasur asnjë telefonatë, nga asnjë autoritet për këto raste.

Gent Progni: Kemi akoma punonjës në institucione që janë me këmbë në tokë dhe mendojnë që para korrupsionit dhe vjedhjeve duhet të ketë ndërgjegjje dhe besueshmëri. Kam një faqe webi të hapur prej 1 viti që quhet “Whistleblower” e cila është e mbrojtur nga Konventa e Gjenevës si bilbil-fryrës për të dhëna që nuk fliten nga masa dhe janë të mbrojtur me ligj si njerëz që japin kontribut në shoqëri.

I jep çdokujt mundësinë për të më dërguar në mënyrë anonime të dhëna që mund të kenë. Në dy emailet e fundit, fliten për miliona euro tendera dhe për një takim që është diskutuar për ndarjen e tenderëve. Emaili i dytë lidhet me ngjarjet e Kadastrës, e cila është bllokuar dhe qytetarët nuk marrin pronësinë. Kemi një korrupsion galopant nga kjo drejtoreshë dhe kemi shumë kompani që i kam denoncuar mbi Kadastrën. Kemi dhënë 450 milionë euro dhe të gjithë sistemet i kemi përtokë dhe të dhënat sheshit. Kemi kapje të sistemit dhe asnjë reagim. Edhe pse kam nxjerr emailet nuk kam marr asnjë telefonatë nga institucionet. Kam bërë një denoncim në SPAK që i ka kaluar Prokurorisë së Tiranës dhe del që Prokuror është burri i Ermonela Felajt.

Kam kuptuar që denoncimet që më kanë dërguar janë të vërteta. Ka ankesa që ka mbivendosje të certifikatave të pronësisë. Të gjitha gjërat e publikuara nga ky email janë të vërteta. Popullit i thonë vetëm gënjeshtra. Më erdhi një informacion, se Kadastra e Durrësit është bllokuar.