Pavarësisht nivelit ekonomik dhe vështirësive që hasim çdo ditë kur na duhet të llogarisim shpenzimet tona, prapësëprapë shqiptarët rezultojnë një popull që nuk ia kursejnë vetes luksin e të dukurit.
Nëse shqiptarët vihen në një peshore me vendet e Bashkimit Europian, disbalancat në nivelin dhe stilin e jetesës janë të dukshme, në drejtim të ushqimeve, transportit, argëtimit, restoranteve. Përjashtim bëjnë veshjet ku ne konkurrojmë bindshëm.
Referuar krahasimit të strukturës së shpenzimeve të familjeve shqiptare dhe atyre të BE-së, kryer nga “Monitor”, e cila është përqëndruar në në Anketin e Buxhetit të Familjeve 2015 të INSTAT dhe anketën e familjeve të BE-së të publikuara nga INSTAT dhe të matura të dyja sipas nomenklaturës COICOP, vihet re se:
Shqiptarët shpenzojnë gati gjysmën e shpenzimeve (48.7%) për ushqime dhe pije jo-alkoolike, krahasuar me europianët që mjaftohen vetëm me 12.3% të buxhetit për të plotësuar nevojat përditshme të të ushqyerit.
Për një pjesë të mirë të vendeve europiane, vendin më të rëndësishëm zë grupi “Shpenzime për banesën, ujë, energji elektrike, qira”, me 23.8%, ndjekur nga “Transporti” me 13.1% dhe grupi “Ushqime dhe pije joalkolike”. Ndërkohë që grupi “Ushqime dhe pije joalkoolike” për shqiptarët zë zë vend më të madh.
Kur vjen puna tek “Veshjet” shqiptarët nuk kursehen duke u vendosur “denjësisht” në një nivel pothuaj të njëjtë me europianët. Ndërkohë që europianët shpenzojnë 5.1% të buxhetit për veshje e këpucë, shqiptarët harxhojnë 4.9%.
Sa i përket harxhimeve për kulturë dhe argëtim, europianët shpenzojnë gati 9% të buxhetit, ndërsa shqiptarët vetëm 3%. Për shkak të hapjes së universiteteve private, shpenzimet e shqiptarëve janë shtuar duke zënë 2.1% të buxhetit krahasuar me europianët që shpenzojnë 1.1%. Kjo jo për shkak se europianët nuk preferojnë arsimimin, por kanë më tepër alternative në arsimin publik. (XH.A/SHUPLAKA)
Discussion about this post