Tentuan të vrasin një të ri në Lezhë, arrestohen vëllezërit shkodranë të shpallur në kërkim

 Policia e Lezhës ka vënë në pranga dy vëllezër nga Shkodra, të cilët ishin shpallur në kërkim me akuzën e “tentativës për vrasje” dhe “armëmbajtje pa leje”.

Në pranga kanë rënë shtetasit Mirsad  Suti(Dekovi), 28 vjeç dhe Avni Dekovi, 32 vjeç, pasi Gjykata e Rrethit Gjyqësor Lezhë me vendimet datë 14.07.2016,  ka caktuar ndaj tyre  masën e sigurisë “Arrest në burg”, për veprat penale “Vrasje me paramendim” e mbetur në tentativë  kryer në bashkëpunim’ dhe “Prodhim dhe mbajtja pa leje e armëve luftarake dhe e municionit”.

Sipas Policisë, “këta shtetas në bashkëpunim me njëri-tjetrin, me datë 23.05.2016 , kanë tentuar të vrasin me armë zjarri shtetasin F.Gjoka në qytetin e Lezhës, duke e lënë të plagosur”.

Gjatë hetimeve janë sekuestruar në cilësinë e provës materiale, dy copa predhe të armës së zjarrit pistoletë, një makinë tip “Seat”, me targë “AA 275 NG”, në pronësi të shtetasit Mirsad Suti, një armë zjarri kallashnikov, me nr. 14190042, dy krehra me fishekë model 56 dhe një motor “Honda”, pa targë.

Materialet procedurale u referuan Prokurorisë së Rrethit Gjyqësor Lezhë për veprime të mëtejshme. (A.R/SHUPLAKA)