Urgjenca e Spitalit Rajonal në Durrës është duke u përballur me një fluks të madh të sëmurësh, të cilët janë prekur nga virozat e stinës me temperaturë të lartë dhe komplikacione.
“Dominojnë virozat e stinës me temperature të larta. Sëmundjet kronike pulmonare janë të shumta, luhatje të tensionit dhe probleme të diabetit”, është shprehur Arian Tivari, mjek i urgjencës së Durrësit për “TCH”.
Fluksi i madh i të sëmurëve në Urgjencë shkaktohet nga mungesa e mjekut të familjes, i cili vijon të mos jetë në shërbim. Në apelin drejtuar institucioneve drejtuese të Shëndetësisë, Urgjenca kërkon marrjen në konsideratë të situatës ku nevojitet shpërndarja e ngarkesës.
Vetëm përgjatë 24 orëve të fundit, mësohet të jenë regjistruar 400 vizita në këtë urgjencë spitalore. (XH.A/SHUPLAKA)
