Prestigjozja “New York Times” i ka kushtuar një artikull hapjes së dosjeve të komunizmit në Shqipëri. Me titullin “Shqipëria i bëri llogaritë me të kaluarën komuniste, por kritikët thonë se është tepër vonë” trajtohen dy histori konkrete si dhe një përshkrim përmbledhës për Shqipërinë e atyre viteve dhe hapat e sotëm.
Artikulli nis me rastin e priftit katolik 73-vjeçar Shtjefen Kurti, i cili u ekzekutua në vitin 1971 për kryerjen e një pagëzimi, ekzekutim për të cilin autoritetet e kohës nuk u shqetësuan aspak të vinin në dijeni familjarët. “Vetëm kur vëllai i tij shkoi në burg për t’i çuar ushqim, ai mësoi fatin e priftit. “Mos u kthe. Ai nuk do të ketë nevojë më për ushqim.”, i tha roja të vëllait.”, shkruan “NYT”.
Në artikull shkruhet se rreth 6.000 shqiptarë u ekzekutuan gjatë regjimit komunist. “Nga vendet e ish-bllokut lindor, Shqipëria kishte regjimin më të ashpër dhe më të izoluar. Enver Hoxha, një stalinist, krijoi një aparat represiv deri në vdekjen e tij në vitin 1985 dhe ky aparat vazhdoi deri në rënien e regjimit në vitin 1991.”, vijon më tej artikulli.
“New York Times” shkruan se edhe në një rajon ku rejtësia për krimet e periudhës komuniste mbetet e pakapshme, Shqipëria dallohet si një nga vendet e pakta që nuk kanë krijuar një institucion për të lehtësuar aksesin e qytetarëve në dosjet e tyre të policisë sekrete, ndryshe nga Rumania dhe Gjermania.
Duke iu referuar vendimit më të fundit të qeverisë, prestigjozja amerikane shkruan se situata pritet që të ndryshojë: “Kryeministri Edi Rama, ka thënë se përpjekja, si rezultat i një ligji të 2015-ës që ai ka mbështetur, do të ndihmojë në zvogëlimin e spekulimeve në lidhje me akuzat se zyrtarë sot kanë përfituar nga lidhjet e tyre të epokës komuniste. Por kritikët thonë se masat nuk kanë substancë dhe janë projektuar kryesisht për të përmirësuar imazhin e Shqipërisë jashtë vendit.”, shkruan “New York Times”. (XH.A/SHUPLAKA)
(Zonë ku u gjetën 21 skelete)
