Rrjeti i drogës në Zvicër, shqiptari kreu i bandës. Si i shiste klientëve heroinë 35-vjeçari

Autoritetet zvicerane kanë zbuluar një rrjet të trafikut të drogës ku kapoja i grupit ishte një kosovar.

Prokuroria Publike e Soloturnit ka ngritur akuzë ndaj një 35-vjeçari kosovar për shkelje të ligjit mbi lëndët narkotike. Ai ngarkohet se ka shitur mbi 40 kilogramë heroinë në rajonin e Oltenit, Kantoni Soloturn, shkruan solothurnerzeitung.ch.

Por rasti në të cilin është ai i përfshirë është shumë më kompleks. Hetimet rreth një rrjeti të drogës në rajonin e Oltenit janë duke u zhvilluar që nga viti 2011, ka bërë të ditur Prokuroria Publike e Soloturnit, përcjell albinfo.ch. Ndërsa personi në fjalë konsiderohet kreu i këtij rrjeti.

Në kuadrin e hetimeve të përmendura janë arrestuar 16 persona, me këtë rast janë sekuestruar edhe shumë prova materiale që shërbejnë si dëshmi.

Ndërsa kosovari i akuzuar konsiderohet se ka pasur rolin qendror në këtë rrjet. Ai, i ka shërbyer edhe personalisht klientëve vetëm në rastet kur droga e kërkuar nga ta ka arritur një sasi të caktuar. Ndërsa sasitë më të vogla të drogës i ka shpërndarë përmes ndërmjetësuesve.

Prokuroria e Solothurnit, për këtë rrjet droge ka iniciuar tashmë ndjekje penale ndaj më shumë se 70 personave. 15 prej tyre kanë marrë ndërkohë dënimet nga 9 muaj deri në 6 vjet burg. Veç kësaj, në janar të këtij viti një personi i është dhënë dënimi prej 8 vitesh burg. (E.K/SHUPLAKA)