Rama flet për herë të parë për kontenierët me lëndë kimike: Do shihemi në gjyq…

Kryeministri Rama ka folur sot në “Top Story”  edhe për 1400 kontenierët që përfliten se kanë hyrë në Shqipëri me mbetje radioaktive.

Rama e ka quajtur të pavërtetë këtë lajm tendencioz sipas tij që kërkon të destabilizojë vendin. Kryeministri tha se qeveria shqiptare do të hapë gjyq ndaj portalit të huaj që përhapi lajmin.

Sipas tij, këto janë lajme të shpifura në Shqipëri për të cilat paguhen mijëra euro që të botohen në mediat e huaja.

Sipas kryeministrit, inteligjenca italiane ka thënë se asnjë kontenier me mbetje radioaktive nuk ka dalë nga Italia për në Shqipëri.

“Këto janë shpifje të ulëta të atyre që duan nesër të qeverisin vendin. Të ishte e vërtetë ajo do të kishte rënë Bashkimi Europian”, tha Rama.

“Cila është e vërteta për këtë alarmin kimik nga çadra? Unë kam parë në çadër gazetarë të cilët i dëgjoj që flasin për brroçkulla por që dalin me flamurin e së vërtetës së madhe, nuk i kanë hyrë kësaj pune se a kanë hyrë me të vërtetë kontenierë. Kështu që  ka marrë fund çdo gjë.  Pse nuk e verifikon, se kjo është një poshtërsi. Ky është dëshpërimi i çadrës, të paguash për të nxjerrë një lajm jashtë shtetit.  Ne me ata do të shihemi në gjyq. Këto janë lajme të rreme,  të fabrikuara” tha më tej Rama.

Bëhej fjalë për lëndë kimike shumë të rrezikshme që dyshohet se janë groposur në Shqipëri. Mendohet se janë përdorur në dokumente si tranzit për në Shkup, por që nuk e kanë kaluar asnjeherë kufirin shqiptar për në Maqedoni.

Portali italian “Pianeta News” publikoi lajmin ku Shqipëria ishte në qendër të tij, e që ka të bëjë me importin e plehrave lëndë kimike në Shqipëri. Sipas investigimit, bëhet fjalë për rreth 2600 kontenierë secili me 22 ton mbetje që duhej të përfundonin për tu ricikluar Maqedoni, por në Shkup mësohet se kanë përfunduar vetëm rreth 1130 kontenierë.

(M.D/ Shuplaka)