Një firmë private në autostradën Durrës-Tiranë ka rënë pre e grabitjes në orët e para të mëngjesit. Plot 1 milionë lekë të rinj është shuma e grabitur së bashku me sistemin e regjistrimit të kamerave.
Ndërkohë që ende nuk bëhet me dije se cila është firma që është grabitur, mësohet se autorët kanë hyrë nga pjesa e pasme e firmës duke shmangur rojet.
Në dëshmitë e dhëna për policinë, rojet janë shprehur se nuk kanë parë gjë pasi ishin në gjumë. Ata kanë rrëfyer se dyshimet lindën pasi ishte hequr sistemi regjistrues. Mendohet që personat të kenë pasur dijeni për vendndodhjen e kasafortës, pasi kanë shkuar menjëherë aty.
Detaje të Policisë së Tiranës:
Sipas informacioneve zyrtare më datë 04.05.2017, rreth orës 05:45, në autostradën Durrës-Tiranë, tek një firmë private, nga pjesa e pasme e saj, duke mos u diktuar nga rojet e sigurisë, kanë hyrë dy shtetas të pa identifikuar, të cilët kanë hapur kasafortën dhe në brendësi të cilës kanë marrë rreth 1.000.000 Lekë, (10 milion leke te vjetra), si dhe sistemin e regjistrimit të kamerave të sigurisë.
Grupi hetimor po punon për identifikimin dhe kapjen e autorëve të kësaj vepre penale.
(XH.A/SHUPLAKA)
