Marrje mendsh, të vjella, helmohen 11 punonjëse të një fabrike në Fushë-Krujë

11 punonjëse janë helmuar së fundmi pasi shkuan në punë. Ngjarja raportohet të ketë ndodhur në një fabrikë këpucësh në Budull të Fushë-Krujës.

Bëhet e ditur se menjëherë pas mbërritjes në vendin e punës, ato patën të njëjtat simptoma si: marrje mendsh, ulje tensioni, të vjella. Në ndihmë u kanë ardhur menjëherë mjekë të zonës që janë marrë me trajtimin e tyre.

Nga të dhënat e deritanishme flitet se shkak dyshohet të jenë bërë substancat tretëse në fabrikë. Policia në bashkëpunim me Prokurorinë e Rrethit Gjyqësor Krujë dhe Inspektoratin e Mjedisit po kryejnë veprimet e nevojshme për përcaktimin e shkakut dhe zbardhjen e plotë të ngjarjes.

(XH.A/SHUPLAKA)