Baze provokoi me kritikat ndaj profesor Kabos por gazetarja publikon pyetjet që bëhen në Oxford

Analisti Mero Baze ngriti dyshimet e tij rreth pyetjeve të profesor Përparim Kabos para juristëve që po testoheshin për KLGJ-në dhe KLP-në, duke thënë se do ishte kurioz ta dinte nëse profesori i kishte njohur më parë ata.

Jo vetëm Baze por edhe një pjesë e ndjekësve e komentuesve online, jo vetëm përgjigjet për të cilat kryesisht ranë dakord se qenë skandaloze, morën në gjykim edhe pyetjet e profesorit. Kabo tha se e bënte këtë për t’i shërbyer atdheut, jo me heshtje.

Gazetarja Edlira Gjoni sjell pikërisht disa nga pyetjet që u bëhen studentëve konkurues në juridik në Oxford dhe Cambridge. Dhe duhet thënë, kanë shumë ngjashmëri me natyrën e pyetjeve të Kabos.

KOMENTI I PLOTË I GJONIT:

”Pyetje standarte që ju bëhen studentëve konkurues për të hyrë në juridik në Oxford apo Cambridge: (pasi kanë kaluar testin super të vështirë e specifik për drejtësinë)

– Nëse gruaja ka përsëritur disa herë se nuk i pëlqen reçeli në mëngjes, e burri ia sjell në tavolinë, bashkë me vezën e bukën e thekur, a përbën ky veprim shkak ligjor për të kërkuar divorcin?

– Vajzat dhe djemtë që bëjnë eksplorime (boycsouts), a kanë axhendë politike?

– Cili është libri i fundit jo-ligjor që po lexon?

– Çfarë keni lexuar së fundmi për situatën në Maymar?

– Si mendoni ju, për çfarë shërbejnë semaforët?

– Po të ktheheshe pas në kohë, në cilën do ktheheshe? Pse?

– Cili precedent është më i referuari në Angli?

– Cili gjyqtar u vra ne shek. XVII një ditë para gjyqit? Sa kohë me pas u zgjidh çështja?

Etj, etj, etj.

Pse duhet të merremi me pyetjet? Mos janë gabim edhe këta që ligjin e kanë frymë? (https://sites.google.com/site/oxbridgeintervieëquestions/laë)

Jo vetëm që testohet njohuria e prirjet bazë, por me këto pyetje shkohet tek karakteri i njerëzve. Përse ai grup i thjeshtë pyetjesh nxehu Shqipërinë? Kollaj të gënjesh veten. Kollaj gënjehet njeriu në pasqyrë. Por dhimbja është e ashpër, miq. Shumë prej nesh ende nuk shkruajmë shqipen të saktë, nuk dimë deklaratën e pavarësisë, shajmë Skënderbeun, njëri-tjetrin, gënjejmë sy më sy, e nxehemi pse na bëjnë pyetje që çjerrin maskat.

Nuk ndreqet gjë duke fajësuar pyetjet, por duke lexuar, që të mos ngelemi shumë gjatë shoqëri jo-reflektuese me gishtin e fajit nga tjetri.

Dhe meqë jemi këtu, cila është akuza më e madhe që i është bërë ndonjëherë Shqipërisë?

Lexoni, miq. Mos shani! Veçanërisht njëri-tjetrin. Jemi pak për t’u urryer kaq shumë mes vetes.” (V.G/SHUPLAKA)