Ish-drejtuesi në policinë e Shtetit Arben Hajdarmataj në një intervistë për Fax Neës ka folur lidhje me nivelin e krimit në vend, si dhe me situatën në të cilën po kalon Policia e Shtetit. Sipas Hajdarmatajt roli i policisë në parandalimin e krimeve është përkeqësuar, për shkak se qeveria i ka përfshirë efektivët në aksione që nuk janë në përgjegjësinë e tyre.
“Unë mendoj se situata politike në të cilën po kalon vendi është një nga arsyet që ka një rritje të krimeve që ndodhin në vend. Në fund të fundit situata politike ndikon në të gjithë strukturat e shtetit, në ç’motivimin e tyre, të cilat kanë detyrë që të parandalojnë çdo lloj krimi, përfshirë atë të vrasjes.
Duke analizuar viktimat e atyre vrasjeve janë të tipit mafioz, çka do të thotë që nëse do të kishte vëmendjen e policisë, do të bëhej e mundur parandalimi i tyre.
Kjo ka ndodhur edhe në vrasjen e fundit, ku viktima ishte një personazh i njohur i policisë, dhe mund të mbahej në vëzhgim nga ana e policisë së shtetit. Me një vendim politik të qeverisë aktuale, policia e shtetit shqiptar merret me detyra që i kanë institucione të tjera. Ne kemi parë punonjës të policisë që në vend që të parandalojnë krimet, merren me pastrimin e plazheve nga çadrat”, u shpreh Hadarmataj.
Ndërkohë duke u ndalur te vrasjet e fundit në Vlorë dhe në Durrës, Hajdarmataj tha se personazhet, të cilët ishin pjesë e botës së krimit duhet të ishin mbajtur nën vëzhgim nga ana e policisë.
“Nëse ne analizojmë vrasjet e fundit në Durrës dhe në Vlorë, kanë qenë vrasje të tipit mafioz, dhe elementët janë të njohura nga ana e strukturave të policisë, nuk kanë qenë ngjarje për motive të dobëta. Policia e shtetit nuk duhet që të ngarkohet me detyra të dyta”, tha ish-drejtuesi i policisë.
Hajdarmataj u shpreh se paratë e pista në vendin tonë janë futur në qarkullim përmes boom-it të ndërtimeve, ndërsa nuk merren masat për analizimin e individëve të cilëve iu jepet leje.
“Fatkeqësisht situata është ashtu siç shprehen dhe mediat ndërkombëtare, them fatkeqësisht pasi nuk do të doja që në vendin tonë të ishte një nivel i tillë i krimit. Në momentin që këto organizata kriminale kanë lidhje me struktura të larta të qeverisë, atëherë kush mund t’i godasë ato?
Në Tiranë kemi një boom ndërtimesh në Tiranë, çfarë është gjithë ky lekë që qarkullon dhe hidhet në ndërtim, dhe askush nuk mund të argumentojë se nga gjendet ato. Nuk ka asnjë masë reale për parandalimin e pastrimit të këtyre parave”, deklaroi ai.
‘’Kërkesa për të arrestuar peshq të mëdhenj, presupozon që janë strukturat e larta sidomos të politikës qeverisëse, që mbrojnë struktura kriminale. Vetëm strukturat më të larta të qeverisë dhe të policisë së shtetit mund të marrin në ngarkim që të lejojnë këtë sasi të madhe kokaine që të hyjë në vendin tonë’’.
“Situata nuk është hiç e mirë, po të shohim me qetësi propagandën që bëhet në media, sot gjysmat e çadrave të plazhit nuk kanë njerëz, aksioni kundër çadrave është asgjë, është një boom propagande dhe bëhet për të mbuluar situatën reale në të cilën ndodhet vendi. Ka një rritje të numrit të gjobvënieve ndaj biznesmenëve.
Unë si ish-punonjës policie e shoh me shumë keqardhje faktin që 50 policë çohen përpara një dere bashkie dhe ruajnë nëse ka hyrë një kryetar apo ka dalë një tjetër. Janë kthyer në roje shalqini. Policia e shtetit po bën dhe punën e institucioneve të tjera, bën rolin e postierit, atë të pastruesit”, përfundoi Hajdarmataj.
(E.K/Faxweb.al)
Discussion about this post