Ministri i jashtëm i Shqipërisë Gent Cakaj ka qenë sot në Kosovë për të ushtruar të drejtën e tij të votës, ku iu ka bërë thirrje qytetëve që t’iu drejtohen masivisht kutive të votimit.
Cakaj shprehet se vota në zgjedhjet e sotme do të jetë vendimtare për të ardhmen e Republikës së re të Kosovës.
“Si qytetar krenar, thjesht ushtrova të drejtën time për të votuar në zgjedhjet e përgjithshme. Vota e sotme do të jetë vendimtare për të ardhmen e Republikës së re. I bëj thirrje të gjithë qytetarëve që të përdorin votën e tyre për të përcaktuar të ardhmen. Do qëndroj gjithmonë me ju”, shkruan Cakaj në reagimin e tij pas votimit.
Më herët thirrje për të marrë pjesë masivisht në votime bëri dhe presidenti Hashim Thaçi, si dhe përfaqësitë diplomatike të SHBA-së, BE-së dhe Britanisë së Madhe në Kosovë.
Mesazhi i Thaçit: Sot Kosova zgjedh legjislaturën e re, që do të nxjerrë edhe qeverinë e re të Kosovës, e cila duhet të përmirësojë jetën e qytetarëve tanë dhe të përballet me sfidat që i kemi përpara. Prandaj, ftoj për një pjesëmarrje sa më të madhe, për një proces elektoral të drejtë, të lirë dhe fer. Kemi ndërtuar traditë të zgjedhjeve të mira dhe të pranuara nga të gjithë. Sot le të fitojë Kosova. HTH
Në Kosovë mbahen sot zgjedhjet e parakohshme për Kuvendin, ndërsa votimet kanë nisur në orën 07:00 dhe mbyllen në 19:00.
Këtë proces zgjedhor, që udhëhiqet nga Komisioni Qendror i Zgjedhjeve (KQZ), do ta vëzhgojnë rreth 30 mijë vëzhgues nga organizata vendore e ndërkombëtare.
Në gjithë Kosovën do të hapen 895 qendra votimi me rreth 2000 vendvotime, ndërsa numri i votuesve është 1937 868.
Jane 25 subjekte politike, mes tyre katër koalicione, 20 parti politike dhe një kandidat i pavarur.
Kandidatët për kryeministër janë:
Haradinaj: AAK-PSD
Osmani: LDK
Veseli: PDK
Limaj: Nisma AKR
Kurti: Vetevendosje
Nenad Rashiq -Koalicioni Sloboda
(E.K/Faxweb.al)
Discussion about this post