Altin Dumani takon ambasadorin britanik, Mbretëria e Bashkuar rikonfirmon mbështetjen për SPAK
Kreu i Prokurorisë së Posaçme Kundër Korrupsionit dhe Krimit të Organizuar (SPAK), Altin Dumani, priti në një takim ambasadorin e Mbretërisë së Bashkuar në Shqipëri, Nicholas Abbott. Takimi u fokusua në mbështetjen që Britania e Madhe i ofron SPAK-ut në luftën kundër korrupsionit dhe krimit të organizuar, si dhe në përpjekjet për të garantuar një proces zgjedhor të ndershëm përmes hetimit të krimeve zgjedhore.
Ambasadori Abbott rikonfirmoi angazhimin e qeverisë britanike për të vijuar bashkëpunimin me SPAK-un dhe institucionet shqiptare në forcimin e sundimit të ligjit. Ai vlerësoi punën e prokurorisë së posaçme gjatë pesë viteve të funksionimit të saj, duke theksuar se SPAK është kthyer në një nga institucionet më të besuara në Shqipëri dhe ka fituar njohje ndërkombëtare për rolin e tij në luftën kundër korrupsionit.
Në prag të zgjedhjeve, ambasadori britanik theksoi rëndësinë e hetimeve të krimeve zgjedhore, duke shprehur mbështetjen për çdo përpjekje që synon forcimin e demokracisë dhe besimit të qytetarëve në proceset zgjedhore.
Mbretëria e Bashkuar mbetet një partnere e palëkundur e SPAK-ut dhe pret me kënaqësi thellimin e bashkëpunimit edhe në vitin 2025, duke mbështetur përpjekjet për një sistem drejtësie të pavarur dhe efektiv në Shqipëri.
