Arrestimi i Henri Çilit, flet kryeprokurori Olsian Çela

Prokurori i Përgjithshëm Olsian Çela i pranishëm në Vlorë në mbledhjen vjetore të KLSH ka folur dhe për arrestimin e Henri Çilit.

“Arrestimi i Henri Cilit, punë e prokurorisë së pavarur. Ky është efekti i reformës në drejtësi. Zbatimi i ligjit sjell keto rezultate”, është shprehur kryeprokurori Çela.

Botuesi dhe biznesmeni i njohur Henri Çili u vë mbrëmjen e djeshme në prangat e policisë, në banesën e tij, pasi akuzohet se ka ndërhyrë në Gjykata për të liruar anëtarët e grupit të zjarrit, të përfshirë në përplasjen me Policinë në fshatin Lazarat.

Ka qenë një hetim i nisur nga prokuroria e Përmetit, prej gjashtë muajsh, ai që ka nxjerrë në dritë dhe emrin e Çilit, që duket se ka biseda me disa persona të arrestuar për drogë, mes të cilëve dhe Adil Aliko, i cili ka dy djemtë e tij në burg, për vrasjen e efektivit të RENEA-s, Ibrahim Basha.

Aliko, i cili kërkonte heqjen e dënimin të përjetshëm ndaj djalit të tij Arbionit, duket se i ka premtuar para dhe toka Çilit, përmes avokatit dhe pedagogut Ilir Korbi, në mënyrë që të riut t’i hiqej dënimi në gjykatën e lartë, pas vendimit të formës së prerë që është dhënë në Apel.