Vetëm pak ditë më parë u arrestuan 5 persona si pjesë e një bande kokaine në Greqi. Policia greke ka zbardhur skemën si funksiononte organizata e kokainës e përbërë nga shqiptarë dhe grekë. Zyrtarisht njoftohet se mes të arrestuarve, 4 janë shqiptarë të moshës 34-56 vjeç dhe një biznesmen grek 61-vjeçar i njohur në zonën e Trikallas në Greqi. Edhe DEA është përfshirë në këtë operacion anti-drogë, i cili u zhvillua në Athinë.
Po kështu theksohet se “truri” i organizatës së kokainës në Ballkan është një 53-vjeçar shqiptar. Sipas policisë greke ai është një ndër njerëzit më të pasur në Shqipëri dhe i përfshirë në fushën e transportit të gazit natyror.
Nga ana e policisë greke u sekuestruan 21 kilogramë kokainë dhe shuma të mëdha parash të dyshuara se janë përfituar nga aktiviteti kriminal. Gjysma e sasisë së kokainës ju gjet biznesmenit grek, kurse gjysma tjetër një 35-vjeçari shqiptar tashmë të arrestuar.
Sipas shtypit grek DEA ende nuk kanë përfunduar hetimet. Agjencia amerikane e zbulimit të trafikut të drogës ka dyshime të forta se biznesmeni shqiptari që drejtonte këtë rrjet droge, ka lidhje të forta në Shqipëri dhe hetimet mund të nxjerrin në dritë të tjera informacione të vlefshme.
Po kështu biznesmeni grek është pronar i një kompanie nafte në Shqipëri dhe është Thanasis Karatzounis, kurse identiteti i biznesmenit shqiptar që drejtonte trafikun e kokainës nuk është bërë i ditur. (J.V/Shuplaka)
Discussion about this post