Papa Françesku ka pritur në një takim krerët e shteteve dhe vendeve të BE, para festimeve të 60-vjetorit të Marrëveshjeve të Romës.
Gjatë këtij takimi, Papa kërkoi rikthimin tek parimet bazë të Bashkimit Europian, mbi të gjitha tek solidariteti.
Sipas tij unioni kërcënohet “nga shuarja” nëse nuk zhvillon një vizion të ri, vizion i cili bazohet në idealin e solidaritetit.
“Kur një trup e humbet sensin e orientimit, dhe nuk shikon më përpara, fillimisht bën hapa mbrapa dhe në fund kërcënohet nga shuarja”, tha Papa në takimin e një dite më parë.
Kreu i Kishës katolike deklaroi se elementi i parë i vitalitetit europian duhet të jetë solidariteti, të cilin e cilëson si një mjet efektiv kundër populizmit.
Mbi të gjitha Papa Francesku foli edhe për rëndësinë e punësimit në Europë si edhe për pagat dinjitoze, pa të cilat sipas tij nuk mund të ketë paqe. (D.D/Shuplaka)
