Si rezultat i rreshjeve të pazakonta të ditëve të fundit në Qarkun e Beratit, pati përmbytje dhe u krijuan vështirësi për qytetarët në disa zona.
Komisioni i Emergjencave Civile thotë se janë evakuuar 109 persona për në qendrat e pritjes dhe tek të afërmit e tyre, ndërsa janë përmbytur 76 banesa kryesisht në bashkitë Berat, Ura Vajgurore dhe 1 banesë në bashkinë Poliçan.
“Në bashkëpunim shumë të mirë me bashkitë nga strukturat e Emergjencave Civile u evakuan 109 persona për në qendrat e pritjes dhe tek të afërmit e tyre. U përmbytën 76 banesa kryesisht në bashkitë Berat, Ura Vajgurore dhe 1 banesë në bashkinë Poliçan.
U përmbytën 207 ha tokë dhe 550 ha nën ujë. Duke filluar nga data 03.12.2017, komisioni i Emergjencave Civile ka filluar fazën e likujdimit të pasojave. Ka filluar rikthimi i të evakuarve në banesa. Qarkullimi në rrugët nacionale dhe drejt qendrave të njësive administrative është normal. Vështirësi ka qarkullimi në rrugët e brendshme të disa fshatrave në bashkinë Skrapar dhe bashkinë Poliçan, ku dhe atje po punohet me shpejtësi për hapjen e tyre. Sistemi shëndetësor ka funksionuar normalisht gjatë gjithë situatës emergjente.
Në të gjitha shkollat e Qarkut ka filluar proçesi mësimor. Furnizimi me energji dhe ujë është drejt normalizimit të plotë. Në bashkinë Berat janë ndarë ndihma për të dëmtuarit nga përmbytjet, të dhënat nga : Dega e Kryqit të Kuq Berat, 200 batanije 500 kg ushqime. Shoqëria “Misioni pa kufi”,100 krevatë , 100 dyshek.
Ministria e Shëndetësisë dhe Mbrojtjes Sociale 50 pako me veshmbathje. Puna po vazhdon me intesitet për të ndihmuar të dëmtuarit si dhe për verifikimin e dëmtimeve në banesa dhe infrastrukturë me qëellim eleminimin e çdo pasoje që shkaktuan përmbytjet.”, thuhet në njoftim. (B.H/Faxweb)
