Ish-kryeministri Sali Berisha ka vijuar sot me një tjetër deklaratë të fortë përballë mediave, ku ka denoncuar gjendjen e rendit dhe drejtësisë në vend, duke e cilësuar Shqipërinë si “tokën e kokainës” dhe duke akuzuar qeverinë aktuale si të zhytur thellë në narkotrafik dhe korrupsion institucional.
Në deklaratën e shpërndarë nga Zyra e Medias dhe Komunikimit e Partisë Demokratike, Berisha i cilësoi përpjekjet për të mohuar ekzistencën e narkoshtetit si “hipokrizi të pashembullt”.
“Të shtrosh sot pyetjen se ku është narkoshteti, je ushtar i Pojës,” – deklaroi Berisha, duke akuzuar drejtpërdrejt lidhje mes segmenteve të krimit të organizuar dhe pushtetit.
Ai publikoi gjithashtu akuza për manipulime zgjedhore dhe falsifikime të fletëve të votimit, duke theksuar se “farsës elektorale po i bëhet autopsia, me prova të qarta që tregojnë deformimin e vullnetit të qytetarëve”.
“Në katër kuti në Vlorë u gjetën mbi 450 fletë të tepërta. Ky është vetëm fillimi. Ne do paraqesim aktin kriminal të ‘trenit bullgar’ me të gjithë shëmtinë e tij”, tha Berisha.
Ish-kryeministri përmendi edhe rastet konkrete që lidhen me mosveprim nga organet e drejtësisë për raste flagrante të trafikut të drogës dhe arratisjeve të personave me urdhër-arrest.
“Shqipëria nuk ka më operacione për kokainën pa ardhur prokurorët ndërkombëtarë. Prokuroria dhe policia këtu janë të paralizuara. Rrogat i kanë për kafe. Ndërkohë që individë të rrezikshëm lajmërohen dhe largohen,” – theksoi ai.
Sipas Berishës, përpjekja për të fshehur narkoshtetin dhe ndikimin e krimit në qeverisje është e kotë, pasi faktet flasin vetë, ndërsa ai premtoi se opozita do të vazhdojë të nxjerrë në dritë çdo shkelje, përballë shqiptarëve dhe komunitetit ndërkombëtar.
