Bilanci i frikshëm në Kavajë, kush janë dy vëllezërit e përfshirë. Njëri prej tyre mbetet i plagosur(Foto+video)

Është mësuar identiteti i personit që mbeti i vrarë mesditën e sotme në Kavajë. Burime bëjnë me dije për FaxWeb.al se ai është identifikuar si Ramazan Hasalliu, rreth 50-vjeç, dhe nuk ka pasur asnjë lidhje me dy grupet kriminale që janë përplasur mes tyre.

Hasalliu ka qenë duke blerë bukë, në momentin që është vrarë aksidentalisht nga breshëria e armëve, tregojnë dëshmitarët nga vendi i ngjarjes. 50-vjeçari ka qenë nga zona e Helmesit, dhe ka pasur tre fëmijë, që do të përjetojnë këtë humbje të madhe.

Personat e dyshuar për ngjarjen

Ndryshe nga emrat që u raportuan fillimisht autorë të dyshuar të kësaj ngjarje janë Marjus Aliaj dhe vëllai i tij D.Aliaj. Marjus Aliaj ka mbetur po ashtu i plagosur në këtë ngjarje dhe po mbahet nën vëzhgim nga ana e policisë.

Sipas bluve janë shoqëruar në Komisariatin e Policisë Kavajë disa persona dhe vijon puna për shoqërimin e personave të tjerë.

6 të lënduarit u transportuan nga patrulla e policisë dhe u dërguan në spitalin e Durrësit, ndërsa një prej tyre në gjendje të rëndë është nisur drejt spitalit të Traumës në kryeqytet.

3 prej të plagosurve janë identifikuar si më poshtë: Sali Mekja, Rustem Dedaj, Arben Ajdini.

Lidhur me ngjarjen e rëndë ka reaguar dhe presidenti Meta, i cili shkruan:

Presidenti i Republikës Sh.T.Z Ilir Meta shpreh shqetësimin e thellë për ngjarjen tepër të rëndë dhe tragjike, të ndodhur sot në qytetin e Kavajës, ku një qytetar i pafajshëm humbi jetën dhe disa qytetarë të tjerë u plagosën.

Presidenti Meta pati një bisedë telefonike me Kryetarin e Bashkisë së Kavajës, z.Isa Sakja dhe i kërkoi t’i përcjellë ngushëllimet dhe solidaritetin e Tij më të sinqertë të afërmve dhe familjarëve të qytetarit që humbi jetën, si dhe u uron shërim të shpejtë të gjithë të plagosurve.

Presidenti Meta kërkon nisjen e menjëhershme të hetimeve për këtë ngjarje të rëndë, zbardhjen e shpejtë dhe të plotë të saj, si dhe vënien para përgjegjësisë të autorëve.

Presidenti Meta thekson domosdoshmërinë e rritjes së gatishmërisë së Policisë së Shtetit dhe agjencive ligjzbatuese, për të marrë të gjitha masat e duhura për garantimin e sigurisë publike në vend dhe parandaluar përsëritjen e ngjarjeve të tilla kaq të rënda e tragjike.

Lidhur me ngjarjen kriminale ka reaguar dhe PD, përmes ish-deputetit Enkelejd Alibeaj, i cili shkruan:

Nje qytetar u vra sot ne Kavaje, ndersa ishte duke blere buke. Ne mes te qytetit, ne mes te dites, perplasjet me arme terrorizojne qytetaret. Krimi nuk e ka me frike qeverine sepse ajo eshte thjesht zgjatim i tij! Policia eshte e zene me arrestime politike pasi krimi ka imunitet nga pushteti ne shqiperi.

Zoti ua lehtesofte dhimbjen familjareve te Ramazan Hasalliut. Sherim te shpejte te plagosurve.

(E.K/Faxweb.al)